Atualità
Dala Junta: bandida FESR de 3,1 miliuns por la digitalisaziun
La Junta provinziala á dé süa aprovaziun ala terza bandida dl FESR, le Fonds europeich de svilup regional, cun 3,1 miliuns de euro.
Le program „Investimënc a bëgn dla chersciüda y dl’ocupaziun“ dl FESR 2014-20202 é partí sö sön cinch pilastri prinzipai y reverda ressurses finanziares da indöt 136 miliuns de euro. Le 50 porcënt di fonds vëgn metü a desposiziun dal’Uniun europeica, le 35 porcënt dal Stat y le 15 porcënt che resta dala Provinzia.
Incö á la Junta provinziala dé süa aprovaziun ala terza bandida da 3,1 miliuns de euro por la presentaziun di proiec tl setur dl contest digital. Le finanziamënt complessif de plü agn é de indöt 32 miliuns de euro. Tl detai ó la secunda bandida favorí les scomenciades de eGovernment y de digitalisaziun tl Südtirol por mioré la capazité istituzionala y aministrativa dl’Aministraziun publica, ince tres le svilup de contesć de laur interatifs por aplicaziuns y sorvisc danter les Aministraziuns desfarëntes. Por ejëmpl por ci che reverda sorvisc che an á adöm danter plü istituziuns (emails, archiviaziun sostitutiva, gestiun di documënc, modulistica interativa), protocols de interoperabilité tla sanité, la prescriziun y la rezeta eletronica o ince les app nöies por l’adoranza de sorvisc dl’AP y plü en general proiec de sorvisc digitai por le zitadin y les impreses.
De plü vantaji gnará insciö a se le dé por i sorvisc dla Provinzia y de atri ënc publics tl Südtirol. I proiec messará gní prenotá cina ai 5 de ma dl 2017 y realisé te n contest de dui agn. Al ne sará nia ametüs al finanziamënt les scomenciadies che prevëiga cosć complessifs sot ai 75mile euro y sura n miliun de euro. Les bandides gnará publicades sön la plata internet dla Repartiziun Europa y sön le Boletin ofizial dla Regiun. Dötes les informaziuns é da ciafé sön la plata internet www.provincia.bz.it/fesr
rc
