Atualità
Assëgn familiar + ai peri: i pröms resultac
Matthias Ausserer é un di pröms peri südtirolej che á fat domanda por ciafé l’assëgn familiar+ y á insciö podü s’anuzé de na palsa sciöche genitur por dui mëisc
Por socodí süa secunda möta á Matthias Ausserer tut la dezijiun da s’anuzé dla palsa de dui mëisc sciöche genitur che é preodüda da na mosöra nöia istituida dal’assessuria por les families Waltraud Deeg. Le datur de laur Andreas Egger (n’aziënda spezialisada tl setur idrotermosanitar) é ince sté a öna cun la ghiranza dl dependënt pere che á damané da podëi tó dui mëisc de palsa dal laur por motifs de educaziun di mituns. L’assessuria Waltraud Deeg á fat dan da püch na vijita tla ciasa dla familia Ausserer, la pröma familia dl Südtirol che á fat domanda por ciafé l’assëgn familiar + nü.
„Cun chësta mosöra de sostëgn él nosc obietif da promöie la poscibilité por i peri da sté a ciasa pro i mituns y da tó na palsa da süa profesciun. La lege statala sön les palses por i peri ti pita insciö ai geniturs la poscibilité da dediché na perioda da tëmp ala cura di mituns y sce i peri anuzëia chësta poscibilité importanta, spo ai ince l’oportunité da ciafé l’assëgn provinzial por les families nü“, sotlignëia Deeg. L’assëgn nü é insciö n contribut por düc i peri che laora tl setur privat y che ó anuzé dla poscibilité, tl pröm ann y mez de vita di mituns, da se tó na perioda de palsa danter i 2 cina ai 3 mëisc. Chësc contribut é nü dal setëmber dl 2016 inant.
L’assessuria por les families Deeg motivëia les families da adoré chësc sostëgn ajuntif por les families. „Al mëss ince mudé la consapevolëza sön les funziuns te familia y al é importanta che les condiziuns de partënza sides adatades por ti pité ai geniturs la liberté plü ampla da tó les dezijiuns y insciö da partí sö l’inciaria dl’educaziun“. Dötes les informaziuns nezesciares por l’assëgn familiar nü y sön les atres mosöres de sostëfgn é da ciafé sön la plata internet nöia che reverda les families sot ala misciun: http://www.provincia.bz.it/famiglia
rc
