Atualità
Presentada la campagna de sensibilisaziun nöia „Bëre cun mosöra“
L’ediziun 2016/17 dla campagna de sensibilisaziun nöia é gnüda presentada incö dal’assessuria Stocker. Tema zentral: mai bëre y dedô rovëne.
L’alcol é n problem sozial de na relevanza scialdi alta, ince por ci che reverda les permanënzes de ospedai y i inzidënc sön strada. Da plü agn laora insciö la Repartiziun Sanité adöm al’assoziaziun „Forum Prävention“ por sensibilisé i zitadins sön la pluralité de risć che taca adöm cun le consum de alcol, dantadöt sce an vá spo cun l’auto. L’assessuria provinziala por la sanité y les politiches soziales Martha Stocker á presenté incö ai 7 de novëmber adöm al diretur Peter Koler y al diretur sanitar Walter Tomsu te na conferënza stampa la campagna de sensibilsaiziun nöia che reverda le bëre y le rovëne. I placac é gnüs ponsá te na manira de comunicaziun inovativa cun i jogn che dess ester da ejëmpl por i zitadins y la popolaziun en general.
L’assessuria provinziala Martha Stocker á sotligné te so intervënt l’importanza fondamentala de campagnes de sensibilisaziun por cherié na maiú cosciënza por ci che reverda i risć da bëre alcol y dedô rovëne. Por amplié chësc messaje él da odëi sön le placat prinzipal dla campagana dui jogn che, sigüsc de süa orenté da ne orëi assolutamënter nia bëre sce ai rovëna, che scraia fora na frasa dër tlera: „Sce i bëri spo ne rovëni nia“. Le fin de chësc messaje é, aladô de Peter Koler, che al vëgn „insciö cherié na complizité danter adulc y jogn te na manira daldöt naturala zënza messëi i confronté o mët un sura l’ater“, insciö Koler.
Le diretur dl „Forum Prävention“ á ince spo presenté na seria de dac che reverda le consum de alcol tl Südtirol: por le momënt él le 3,5 porcënt dla popolaziun che patësc de na dependënza alcolica (zirca 15.000 – 25-000 porsones) cun zirca le 10 porcënt (2.000 porsones tl 2015) che é en cura te öna dles strotöres spezialisades dla Provinzia. Implü él spo 10 – 15 porcënt dla popolaziun südtiroleja che á n comportamënt problematich cun le consum de alcol (dai 50.000 ai 75.000 zitadins). Aladô dl’ultima inrescida ISTAT dl 2016 é le consum cuotidian de alcol tl Südtirol sot al valur mesan dla Talia: 15,5 porcënt di südtirolej (te döta la Talia é le valur de 22,2 porcënt) consumëia alcol vigni de, 24,2 porcënt di ëi cuntra le 7,2 porcënt dles ëres. Tl 2014 ê i dac plü alc cun 18,5 porcënt di südtirolej en general, 27,6 porcënt di ëi y 9,9 porcënt dles ëres.
Por le valur potenzial alt da tosser dl alcol pól daneje prësc düc i organs dl corp dles porsones. Plü de 60 maraties pó avëi sciöche gaujia le consum de alcol. Le limit plü alt vëgn araté por n ëra de öna na boanda standard al de, por i ël de döes boandes standard al de, cun dui dis al’edema zënza bëre alcol. Por plü informaziuns: www.bereresponsabile.it
rc
Galaria dales fotografies
Retrat: USP/mp
