Atualità
1,6 miliuns euro por le sostëgn de popolaziuns te arees de crisa
23 é indöt les domandes de finanziamënt presentade da assoziaziuns y organisaziuns tl contest dla cooperaziun al svilup y azetades dala Provinzia.
Indöt gnarál cofinanzié dala Provinzia 23 proiec presentá dales organisaziuns y assoziaziuns cian al 1 de setëmber dl 2016 tres la Repartiziun Cooperaziun al Svilup cun l’obietif da sostigní les popolaziuns ti raiuns de crisa di Paisc dla pert süd dl monn. La soma compelssiva dl investimënt sará de 1,6 miliuns de euro cun fonds che fej referimënt ai agn 2016 y 2017. La Junta provinziala á metü a desposiziun chëstes ressurses sön la basa de n arat positif dl Ofize Chestiuns de Cabinet. I intervënc fej referimënt ai obietifs scric dant por les ativités de cooperaziun al svilup sön la basa de n program anual y de na bandida de concurs scrita fora aposta. Un di fins prinzipai dl proiet é chël da combate cuntra la denutriziun y la fan.
14 proiec gnará realisé tl’Africa. Al se trata di Paisc Uganda dl Oriënt, Sudan, Sudan dl Süd, Etiopia y Burkina Faso olache al é gnü a se le dé na gran süta, ciarestia y ince esondaziuns. La priorité é chëra da partí fora mangiaries, somënzes y da mët a desposiziun tiers da zidlé. Implü, por gaujia de conflic de dorada lungia tl Sudan dl Süd y tla Republica dl’Africa zentrala, él n gröm de porsones che sun sciampa (dal’Uganda se nen él sciampé te d'atri Paisc indöt zirca 300mile muciadus). Por smendrí chësc fenomen él Provinzia che laora adöm ala Caritas cun mosöres y scomenciadies spezifiches por daidé da ciafé na soluziun pazifica ai conflic. Atri obietifs di proiec de sostëgn é ti Paisc dl’Africa l’inserimënt dles ëres tl monn dl laur y da daidé i muciadus che vá indô zoruch ti seturs dl’agricoltöra, dla formaziun y dla sanité. Cun n proiet vëgnel ince sostigní le iade derevers de migranc dal Senegal cun mosöres por alisiré l’inserimënt.
N’atra area cun intervënc aprová dala Provinzia reverda i Paisc dla Siria, Irac y Libanon, oalche la Provinzia sostëgn proiec de formaziun por i profugs y migranc, por l’assistënza sanitara, la mosöres de sostëgn dles vitimes de violënza y por la garanzia de n davagn. Cater é i proiec che vëgn sostignis tla Siria. Un n proiet reverda insciö le sostëgn cun mangiaries por les popolaziuns zënza ciasa dlungia Aleppo por zirca 1.800 porsones. Implü vëgnel ince daidé cun n proiet spezifich 1800 families che é en gran dificolté tla Regiun de Al-Jazeera. N terzo proiet prevëiga la promoziun dla formaziun y educaziun por zirca 1.900 scolars y studënc che é gnüs atocá dala vera tla Siria. Atri proiec de sostëgn por ëres, families y porsones zënza ciasa é preodüs tla Palestina y tl Kurdistan.
rc
