Atualità
Brosciüra nöia por ladin dl sistem dles tarifes tl trasport publich
„Liedesc zënza auto tl Südtirol“ á inom la brosciüra nöia dla Repartiziun Mobilité y che reverda les informaziuns prinzipales sön le sistem tl trasport publich.
„Por le pröm iade él gnü coiü adöm te n sföi de consultaziun cun dötes les informaziuns che reverda le sistem tarifar dl trasport publich local, l’adoranza dles chertes de iade y i abonamënc sciöche ince i dërc y i dovëis dles porsones che s’anüza dl sorvisc de trasport publich local“, á splighé l’assessur por la mobilité Florian Mussner. „La brosciüra d’informaziun é n ater vare por mët a desposiziun a düc i zitadins les informaziuns sön le trasport publich te na manira efiziënta, trasparënta y dlungia ai zitadins“, insciö l’assessur Mussner.
Cun l’inserimënt dl „Südtirol Pass“ de forá tl 2012 él gnü fat n’elaboraziun prinzipala dl sistem dles tarifes dl trasport publich te na manira plü dlungia ai anuzadus di zitadins. Le funzionamënt dla cherta dl „Südtirol Pass“ é spo gnü adaté y amplié ti ultims agn. „La brosciüra dess insciö ester n pice manual d’informaziun completa por anuzadus esperc sciöche ince por chi che fej la cherta por le pröm iade“, á dit Mussner.
La brosciüra nöia „Liedesc zënza auto tl Südtirol“ é gnüda elaborada dal’Agenzia por la Mobilité adöm cun la Repartiziun Mobilité, l’Ofize Trasport publich y cun le Zënter d’informaziun dla Rëi dl Trasport publich local. Da ciafé él danter l’ater informaziuns sön l’adoranza dles chertes y di abonamënc, le significat di dessëgns sön i automac tles corieres y tles staziuns, le funzionamënt di abonamënc di scolars y di seniors, le viaje cun tiers, rodes o cufri y ince informaziuns ütles sön i iadi tles regiuns vijines y cun i nighliner. Al vëgn ince informé sön i dërc y i dovëis di viajadus che reverda ince les straufunges.
La brosciüra é da ciafé debann pro dötes les portines d’informaziun y tles staziuns dles ferates y é gnüda arjignada ca por ladin, todësch y talian. Tosc sará ince desponibla na verjiun online.
rc
