Atualità
Autonomia y federalism, convëgn cun Juncker a Balsan
Le presidënt dla Comisciun Europeica, Jean-Claude Juncker, sará a Balsan ai 18 de novëmber por tó pert al convëgn sön autonomia y federalism.
Do la manifestaziun de ai 5 de setëmber a Ciastel Sigmundskron vá les scomenciadies inant por recordé i 70 agn dal’acordanza de Paris danter le Presidënt dl Consëi talian Alcide Degasperi y le Minitser por i afars cun l’ester austriach Karkl Gruber che é la fondamënta dl’autonomia de aldedaincö. La proscima incuntada por recordé chësc avenimënt storich vëgn organisé ai 18 de novëmber dala Provinzia de Balsan adöm al’Université Lëdia de Balsan y sará dediché ala tematica „Autonomia y federalism t’Europa“. De plü sará i intervënc de storics y esperc de dërt sciöche Walter Obwexer, Christina Binder, Antonio D'Altena, Helmut Tichy y Jens Woelk. Al sará ince presënt n ghest d’onur, le presidënt dla Comisciun Europeica Jean Claude Juncker che rajonará te so intervënt dl prinzip de sussidiarité y dles prospetives dles Regiuns tl’UE. Le convëgn „70 agn acordanza de Paris: autonomia y federalism t’Europa“ gnará daurí dal presidënt dla Provinzia de Balsan, Arno Kompatscher, y dal presidënt dl’Université Lëdia de Balsan, Konrad Bergmeister
en vëndres ai 18 novëmber dl 2016
dales 10:00
tl’aula magna dl’Université
plaza Université 1
a Balsan.
rc
