Atualità
Regiun, contribuc ampliá ales families cun mituns en afidamënt
La Junta regionala ampliará i contribuc a chi che fej ativités de cura y a chi che á pordü le laur, sostëgn ince ales families cun mituns en afidamënt.
La Junta regionala á traté incö danmisde ai 11 de novëmber le dessëgn de lege de „stabilité“ che gnará traté tosc tl Consëi regional. Sön proposta dl’assessuria Violetta Plotegher á la Junta regionala aprové dui articui cun novités importantes por ci che reverda la materia dla previdënza. L’articul 2 dl ddl prevëiga da portenzié i intervënc a bëgn di zitadins che paia de süa bona contribuc de previdënza y che fej sorvisc de cura al intern dla familia o che é te na situaziun de dificolté por avëi pordü le laur. Le contribut, che podará rové cina a n mascimo de 4.000 euro, sará vincolé al status de „ciasarina“, a porsones che á pordü le laur, dantadöt sce ai jará tosc en ponsiun.
L’articul 3 dl ddl prevëiga n contribut che passa da 7 mile a 9 mile euro por düc chi che é autorisá da fá versamënc volontars por la creaziun de na ponsiun d’oblianza y che fej na palsa dal laur por ciaré do ai mituns. La mosöra sará ampliada a dötes les families che á ince mituns en afidamënt. „Al é families cun na funziun soziala dër importanta, deache ares mët a desposiziun so tëmp, energies y amur por mituns che é te na situaziun familiara dificoltosa“, á splighé l’assessuria competënta Plotegher.
USP
