Atualità
Socodí i mituns amará: Incuntades a San Martin, Urtijëi y Corvara
Ai 23, 24 y 30 de novëmber él la Direziun dles Scolines ladines che mët da jí sëres d’informaziun cun la doturia Delago sön les cures naturales por mituns amará
Tres de plü geniturs ti á crëta a metodes de cura naturales canche ara nen vá da socodí les mitans y i mituns amará. Por ti pité ai geniturs na suraodüda generala de chësta tematica él la Direziun dles scolines ladines che mët da jí de plü sëres d’informaziun a San Martin de Tor, a Urtijëi y a Corvara cun la pediatra de omeopatia classica y doturia Elisabeth Delago. L'esperta tignará por l'ocajiun n referat dal titul „Kranke Kinder natürlich behandeln“. Al gnará rajoné dles metodes naturales da curé maraties, sciöche por ejëmpl le infascé ia, i tês da bëre y la homeopatia classica. Le referat sará por todësch, naturalmënter podarál gní fat domandes ince por ladin y talian. Inviá é düc i geniturs che á de piceres mitans y mituns, nia ma dl’eté dla scolina mo ince surafora sciöche ince düc chi che é interessá ala materia.
La pröma incuntada gnará a se le dé en mercui, ai 23 de novëmber dl 2016, dales 20:00 tl salf di Destödafüch a San Martin de Tor, spo la secunda sëra sará en jöbia, ai 24 de novëmber, tla scolina Saliëta de Urtijëi (tres dales 20:00) y la terza incuntada sará spo en mertesc, ai 30 de novëmber, dales 20:00 tl salf dla calonia de Corvara.
USP
