Atualità
Dala Junta: Mëmbri nüs dl’Unité de coordinamënt por les dependënzes
La Junta provinziala á aprové la composiziun nöia dl’Unité provinziala de coordinamënt tl setur dles dependënzes.
La lege provinziala 3 dl 2006, che regolamentëia les mosöres tl setur dles dependënzes, prevëiga che la nominaziun di componënc de n’Unité provinziala de coordinamënt sides de competënza dla Junta provinziala. Do che dui componënc dl’Unité, Bruno Marcato (rapresentant di sorvisc soziai spezialisá dl setur publich) y Sylvia Rainer (rapresentanta dla Repartiziun Politiches soziales), ne é nia plü a desposiziun por chësta inciaria él sté nezesciar da i baraté fora.
La Junta provinziala á insciö nominé incö ai 15 de novëmber Verena Egger sciöche rapresentanta dla Repartiziun Politiches soziales y Bernhard von Wohlgemuth por i sorvisc publics spezialisá. Implü fejel pert dl’Unité Peter Koler en rapresentanza dles organisaziuns privates, Bettina Meraner por i sorvisc sanitars publics spezialisá y Peter Santa por la Repartiziun Sanité dla Provinzia.
Danter i compic dl’Unité de coordinamënt él danter l’ater l’elaboraziun de diretives, mosöres y proiec tl setur dles dependëntes, le monitoraje dl fenomen tl Südtirol, les relaziuns sön les maraties da dependënzes, le coordinamënt y l’integraziun danter i ofizi provinziai competënc y i sorvisc y les strotöres dl setur sozial y sanitar.
USP
