Atualità
Dala Junta: Mobilité publica, inhouse y trasport di scolars
Mobilité publica: la Junta á aprové le regolamënt d’esecuziun dla lege söla mobilité, amplié la soma por le trasport di scolars y sburlé por na dezijiun inhouse
Öna dles dezijiuns importantes dla Junta provinziala é stada incö ai 29 de novëmber l’aprovaziun dl regolamënt d’esecuziun dla lege provinziala sön la mobilité publica. „Cun chësta lege provinziala sön la mobilité fajun avarëi daldöt nosta competënza primara te chësc setur por garantí n sorvisc dl trasport publich tres plü efiziënt y daimpró ai zitadins“, spliga le presidënt dla Provinzia Arno Kompatscher. Cun la lege nöia ne él insciö nia ma sté meso da partí sö te na manira tlera les competënzes al intern dl’aministraziun provinziala, mo ince da elaboré le plann dla mobilité y da definí avisa i compic di gesturs. „Por le pröm iade vëgnel ince inserí te na lege i contignüs dla Cherta dla cualité di sorvisc, cun le fin da mioré döta l’oferta dl trasport publich local“, insciö l’assessur por la mobilité Florian Mussner. Tres le regolamënt vëgnel ince stabilí le finanziamënt di coliamënc cun les regiuns vijines, la firma dles convenziuns sides cun la sozieté inhouse STA (Strotöres trasport Südtirol) co ince cun i operadus statai por garantí na gestiun efiziënta. „Chësta lege é na buna basa por garantí inant le livel alt dla mobilité publica tl Südtirol y dla cualité di sorvisc dles corieres, ferates y dles furnadoies locales“, dij l’assessur Mussner.
Ince aprové á la Junta provinziala incö l’assegnaziun dles linies urbanes a na sozieté inhouse y nia tres na bandida europeica. Les conzesciuns atuales por i sorvisc dl trasport publich de linia tl Südtirol restará varëntes cina ai 18 de dezëmber dl 2018. „Da chël momënt inant messará spo les conzesciuns gní surandades tres gares europeiches, sciöche preodü dales diretives europeiches“, recorda le presidënt Kompastcher. Chësc sará ince le percurs por ci che reverda les linies extraurbanes, mo nia por ci che reverda i sorvisc urbans tles cités de Maran, Balsan y Laives. „Do avëi analisé la chestiun á la Junta stabilí da orëi jí te na direziun inhouse cun na sozieté de partezipaziun daldöt publica che manajëia les linies urbanes. Al gnará stlarí tosc sce al sará nezesciar te chësc contest ince na presënza direta dla Provinzia al intern dla sozieté SASA“, insciö Kompatscher. „Chësta surandada inhouse reverda ma les linies de Balsan, Maran y Laives, sciöche preodü dales normes dla lege provinziala sön la mobilité nöia“, ajuntëia l’assessur Florian Mussner che recorda che ince pro la surandada inhouse gnarál ciaré che la sozieté mantëgnes i standarg de cualité, dl bilinguism, dla puntualité, netëza y en general dles esigënzes di zitadins.
Implü á la Junta provinziala ince aprové incö na soma ajuntiva por le sorvisc dl trasport di scolars de 209mile euro y che röia lapró ai 7,5 miliuns de euro bele preodüs por l’ann 2016 y les ressurses é gnüdes metüdes a desposiziun dala Repartiziun Dërt al Stüde. „Cun chësc contribut sun stá bugn da socodí les ghiranzes locales, dantadöt ince por ci che reverda le sorvisc dl trasport por scolars cun handicaps, mo ince di scolars che fej sport y musiga“, sotlignëia l’assessur por la mobilité Florian Mussner.
USP
