Atualità
Dala Junta: DURP tl frabiché abitatif alisiré da jená 2017 inant
La Junta provinziala á confermé incö l’introduziun dla DURP ince pro les prestaziuns dl frabiché abitatif alisiré dal 2017 inant.
LA DURP é la detlaraziun dla situaziun economica che le zitadin mëss presenté por podëi avëi azes a n valgönes prestaziuns economiches y alisiraziuns tarifares. I sindacac â damané do n spostamënt dl’introduziun dla DURP tl frabiché abitatif alisiré da jená 2017 inant por gaujia che n valgönes categories de zitadins (seniors en ponsiun o families cun un n genitur) podess resté zënza alisiraziun. Incö á la Junta provinziala debatü dla tematica y sön la basa dles osservaziuns di ofizi competënc él gnü tut la dezijiun da confermé l’introduziun dla Durp dal pröm de jená dl 2017 inant.
I eperc á recordé che bele do les prömes simulaziuns él gnü a se le dé spostamënc (al é gnü alzé la pröma fascia de davagn, smendrí de püch la cuinta) y al é ince gnü controlé che n valgügn punc de svantaje ne reverda nia l’introduziun dla DURP mo le regolamënt dla cumpëda minima. L’aplicaziun y les conseguënzes dl’introduziun dla DURP gnará ejaminá tresfora cun la poscibilité da fá ince mudaziuns por mioré le sorvisc. La DURP por la ciasa gnará insciö adorada dal 2017 inant por dötes les domandes che reverda alisiraziuns pro la cumpra, la costruziun o le ressanamënt dla pröma ciasa, contribuc por l’eliminaziun de barieres architetoniches, l’assegnaziun de terac alisirá da pert di Comuns, l’ocupaziun di frabicac convenzioná, i contribuc al fonds sozial d’emergënza y pro d’atri sorvisc.
USP
