Atualità
Ferates: Dal CIPE 49 miliuns por la varianta de Riga
Kompatscher y Mussner aprijëia l’aprovaziun da pert dl CIPE de 49 miliuns de euro por le coliamënt feroviar diret danter Bornech y Porsenú.
Dal fonds dl svilup y coejiun dl Comitê interministerial por la programaziun economica (CIPE) gnarál a se le dé n contribut por la realisaziun dl coliamënt feroviar diret de Puster cun Porsenú, la varianta de Riga. „Cun i 49 miliuns metüs a desposiziun da Roma – comentëia le presidënt Arno Kompatscher – él meso da fá n vare important inant por ci che reverda la realisaziun de n’opera fondamentala por le teritore te n contest de na mobilité tres plü sostenibla che porta vantaji sides ai pendolars co a düc i passajiers. Chësc investimënt é le resultat de na colaboraziun garatada cun le CIPE y le Minister di trasporc Graziano Delrio.“
Le fonds de svilup y coejiun é n plann operatif che garantësc finanziamënc cina l’ann 2020 por na seria de operes publiches, y i investimënc ala varianta de Riga, „sará n contribut important por mioré te na manira concreta le trasport publich tl Südtirol“, spliga l’assessur Florian Mussner. Le coliamën diret dla linia feroviara de Puster cun Porsenú ne sará nia ma n gran vantaje por l’ambiënt, mo ince na sauridanza por i zitadins cun tëmps di iadi plü cörc. Bele por la fin dl ann, insciö l’assessur Mussner, dessel gní debatü tla Junta provinziala dles carateristiches tecniches dl’opera.
USP
