Atualità
Relief de Mussolini: asseniazion di lëures
N var inant n cont dla storisazion dl relief che reprejentea Mussolini sun la plaza de Sunieria a Bulsan. Lëures agiudichei provisormënter.
L se cuncretisea l proiet de deputenziamënt y de cuntestualisazion d l relief de Hans Piffrader, che reprejentea Mussolini a ciaval, sun la fassada dl palaz di Ufizies finanzieres sun Plaza dla Sunieria a Bulsan.
Do che l ie unì sëurandat la proietazion, la direzion di lëures y l coordinamënt dla segurëza al architët de Bulsan Luca Marchesoni, che n cunlaurazion cun Uli Prugger (Gruppe Gut) à elaburà n cunzet sun la basa dl’idea di artisć Arnold Holzknecht y Michele Bernardi, che à venciù l cuncors curespundënt metù a jì dala Jonta provinziela, iel ncuei, 20 de jené, l mumënt dl’agiudicazion provisora dl apalt di lëures a cuntlujion dla pruzedura negozieda. La unirà furmaliseda y stluta ju definitivamënter n lunesc, ai 23 de jené. Do che l sarà passà i 35 dis de “stand still” puderan ala fin de fauré stipulé i cuntrac y assenië ufizielmënter i lëures. La fin di lëures ie preududa tl lim di 70 dis naturei y cunsecutives y, cundechël, tl tëmp di prim diesc dis de mei 2017.
Per l presidënt y l vizepresidënt dla Provinzia Arno Kompatscher y Christian Tommasini se tratel de n var mpurtant che porta pro a na reflescion sun la storia culetiva. La cuntestualisazion juderà a “lecurdé” y “mantenì tla cuscienza” n tëmp storich trangujënt acioche l sibe n amunimënt per la generazions dl daunì.
Tl cheder dl ntervënt de cuntestualisazion y spligazion dl relief uniral, coche n sà, metù sun l’opera la scritura "Deguni ne à l dërt de ulghé" aldò de na zitazion de Hannah Arendt. Hannah Arendt fova na filosofa, storica y scritëura tudëscia, che derubeda di dërc zevii y perseguiteda pervia de si pruvenienza judiera tla Germania nazista, ova messù emigré ti USA, ulache la à giapà la zitadinanza americana. L ntervënt de storisazion dl relief vën acumpanià dala Repartizion Patrimone dla Provinzia, tres l Ufize Manutenzion frabiches cun a cë Daniel Bedin.
L apalt fova metù adum da trëi pruzedures negoziedes.
Per la prima pruzedura negozieda, n referimënt ala furnidura y al pusizionamënt dla scritura sluminënta (frasa de Hannah Arendt) se à davanià l’asseniazion di lëures la firma Neon Alpi de Unterrain – Eppan cun n arbassamënt dl 35,51 % sun la soma de basa de lincant, che adum cun i cosć dla segurëza ndichea na soma cuntratuela de n 26.500 euro + IVA.
Per la segonda pruzedura negozieda, n referimënt ai lëures de dertureda dla spurjënza de peton sainsom y de lëures sëuraprò se à la firma Bolzano Costruzioni de Bulsan davanià i lëures cun n arbassamënt dl 13,75 % dla soma de basa de lincant, che adum cun i cosć dla segurëza cumporta na soma cuntratuela de n 82.000 euro + IVA.
Per la terza pruzedura negozieda n referimënt ai lëures de lectrisc (Mplant eletrich y videoverdia cun telecameres a definizion auta dl relief y dl raion dla Plaza dla Sunieria dan la frabica di Ufizies finanzieres) à la firma M.G.M. Electric de Auer giapà l’asseniazion cun n arbassamënt dl 31,30 % sun la soma n basa de lincant, che cun la spëises dla segurëza ndichea na soma cuntratuela de n 23.500 euro + IVA.
USP
