Atualità
N pension l diretëur dla Repartizion economia Hansi Felder
Vijita de cumià dal presidënt Arno Kompatscher da pert dl diretëur dla Repartizion economia Hans Felder, che lascia l servisc per jì n pension.
Tl Palaz Widmann iel unì a se l dé l’ancunteda de cumià danter l presidënt Arno Kompatscher y l diretëur Hansi Felder, che lascia cun l prim de fauré la direzion dla Repartizion economia per jì n pension. L presidënt Arno Kompatscher à nuzà l’ancunteda per ti mbincë dut l bon per l daunì a Hansi Felder y per l rengrazië per l mpëni prufesciunel desmustrà lauran per l’aministrazion pruvinziela che ie jit a bën de mprejes y zitadins. „Perdrët messëssi vester te chësc mumënt desplajù, ajache l diretëur Hansi Felder à raprejentà per ani la figura de n sëurastant publich cumpetënt, mpenià a svilupé y purté inant l’economia locala y a trasfurmé cuncretamënter la dezijions dla politica te azions aministratives“, à dit Arno Kompatscher.
Hansi Felder, ladin de Gherdëina, à scumencià si cariera tl’aministrazion pruvinziela tl 1975, tl prim sciche secreter particuler dl assessëur Franz Spögler y dopro dl assessëur Werner Frick. L ie pona deventà diretëur de ufize tl 1996 y tl 2005 al pona sëurantëut la ncëria da diretëur dla Repartizion Economia cun la njonta nce dl ciamp dl turism. Danterite al laurà per n valgun ani coche diretëur dl ufize per l turism de Sëlva, na esperienza che ti à mpermetù a Felder – sciche ël nstës lecorda – de cunëscer plu da daujin l funzionamënt dl’economia n particuler dl turism dal pont de ududa di operadëures economics y de svilupé na sensibltà particulera per la esigënzes dl’economia locala.
usp
