Atualità
Dala Junta: coriera danter Sanciana y Ciadura, le sorvisc vá inant
Al jará inant almanco cina la fin de merz le sorvisc de coliamënt dles corieres danter Sanciana y Santo Stefano di Cadore. Chësta la dezijiun dla Junta.
Le coliamënt ê gnü planifiché sciöche proiet de proa cun n’acordanza danter les provinzies de Balsan y Belun. Le coliamënt cun les corieres dl sorvisc publich ne ê insciö nia ma ponsé por ti jí adincuntra ales esigëntes di ghesć y dles porsones che vá sö por munt, mo ince por socodí les tröpes domandes da pert dl monn dl laur, en manira particolara da pert di pendolars che laora ti seturs dl comerz y dl turism. Tl 2016 é le numer di passajiers aumenté de 31 porcënt en confrunt al 2015 y é insciö n vare inant por ci che reverda le coliamënt danter les döes provinzies.
Incö (ai 31 de jená) á la Junta provinziala tut la dezijiun da proroghé cina almanco la fin de merz le sorvisc de coliamënt danter Sanciana y Santo Stefano. L’assessur por la mobilité Florian Mussner á sotligné che „chësta linia favorësc la mobilité alternatica y scona insciö l’ambiënt dles Dolomites cun n smendrimënt ince dl’adoranza de auti privac“. L’assessur firmará la conveziun nöia por le sorvisc de coliamënt danter les döes localités. Sön döta la trata da 66 chilomteri pón viajé cun les chertes, i abonamënc y les condiziuns dl sistem dl trasport publich dla Provinzia de Balsan: chël ó dí che al é poscibl da adoré ince le Südtirol Pass, l’Abo+ y la Mobilcard. La spartiziun di cosć danter les döes provinzies é partida sö aladô di chilometri che toma ite tl Südtirol (42 porcënt dl percurs) y tl Belun (58 porcënt dl percurs).
usp
