Atualità
Conturines, PPP, Mëmber nü dla Consulta por l’archirida
Ince n’inrescida paleontologica di andri de Conturines fej pert di cinch proiec d’archirida scientifica che ciafará n finanziamënt do l'arat positif dla Junta
La Junta provinziala á alzé ai 7 de forá la soma a desposiziun por proiec de archirida scientifica de 1,4 miliuns de euro cun chi che al gnará finanzié 5 stüdi. Cun la terza bandida de concurs â la Junta bele assegné n finanziamënt de 2,9 miliuns de euro por i agn 2016-18. Incö á la Junta provinziala spo metü a desposiziun ciamó 1,4 miliuns de euro sön la basa de n cronoprogram de finanziamënt sön de plü agn. I cinch proiec che gnará finanziá é gnüs presentá dal’Université Lëdia de Balsan, dal'Eurac y dal’Université de Desproch. I proiec nüs reverda insciö la proteina MCL1 por le tratamënc di tumors, la sconanza y l’adoranza dl’ega tl’ecosistem alpin en relaziun ai cambiamënc dl clima, la produziun sostenibla dla cern d’armënt tl Südtirol, la storia dles popolaziuns tl’eté medievala, n’inrescida paleontologica di andri de Conturines. L'inrescida tles Dolomites gnará fata dal Istitut de Geologia dl'Université de Desproch sot ala direziun de Christoph Spötl.
„Bele en ocajiun dla pröma valutaziun él gnü anunzié che la Junta ess podü amplié les ressurses a desposiziun ince por merit dla gran preparaziun de stüdi da pert di ënc d’archirida y chësc é sëgn gnü fat“, á splighé le preisdënt dla Provinzia Arno Kompatscher.
N’atra dezijiun dla Junta da incö é stada chëra da nominé le professur Paolo Lugli, retur nü dla LUB, sciöche mëmber dla Consulta provinziala por l’archirida scientifica y l’inovaziun. Lugli tolará ite le post sciöche rapresentant dl’université che atualmënter é curí da Stefan Zerbe dla Facolté de Sciënzes y tecnologies. Implü á la Junta ince nominé Astrid Weiss sciöche rapresentanta dl setur dl’argicoltöra do les dimisciuns de Irene Unterkofler. Le compit dla Consulta, istituida tl 2006, é danter l'ater chël da elaboré propostes y diretives por la promoziun dla sciënza y l’inovaziun che é la basa por la redaziun dl plann de plü agn por l’archirida scientifica y l’inovaziun provinziala.
Implü á la Junta ince debatü incö sön la proposta presentada da de plü edemes por ci che reverda n proiet PPP (Public Private Partnership) por la surandada esclusiva por 15 agn dles conzesciuns dl trasport publich aldinfora dles cités. „Al é gnü a se le dé na valutaziun negativa – spliga le presidënt Kompatscher – deache la proposta ne respetëia nia les condiziuns iuridiches y de contignüs. Chësc ne ó nia dí che la proposta de partnership danter publich y privat ne vëgnes daldöt nia plü conscidrada, mo che les condiziuns por la presentaziun mëss ester d’atres.“ Le Landeshauptmann á ajunté che „al é gnü analisé dër tröpes prozedöres bele atuades a livel europeich d’assegnaziun dles conzesciuns. Tles proscimes trëi edemes gnarál fat dötes les valutaziuns nezesciares por ci che reverda vantaji y svantaji dles soluziuns poscibles por tó spo na dezijiun. Da chël momënt gnarál spo metü man cun la prozedöra d’assegnaziun dles conzesciuns nöies che sará varëntes da dezëmber dl 2018 inant“, insciö Kompatscher.
Inultima á la Junta provinziala ince aprové incö mudaziuns ai conzec de svilup turistich di Comuns de Schnals y Mühlbach.
usp
