Atualità
Cinch agn Südtirol Pass: 53,3 miliuns de obliteraziuns al ann
Da süa introduziun tl 2012 él gnü fat domanda por indöt 189.435 Südtirol Pass. „De chisc indöt 9.537 ma tl 2017“, spliga l’assessur Mussner.
53,3 miliuns de obliteraziuns al ann, de chëstes mesamënter 146.000 al de y 9.500 anuzadus nüs dl Südtirol Pass ma tl 2016 – chësc é le bilanz dl Südtirol Pass, la cherta eletronica por le trasport publich local dl Südtirol. „Dala introduziun dla cherta tl 2012 él gnü registré na domanda do indöt 189.435 Südtirol Pass – de chisc él 134.872 che vëgn anuzá ativamënter, cun n terzo che pó viajé cun la tarifa promoziala por families“, chësc é le fazit dl assessur por la mobilité Florian Mussner. Implü él 7442 porsones che viajëia cun le Südtirol Pass „free“ por porsones cun handicaps. Indöt 78.700 scolars, studënc y lerneri á le Abo+, le Südtirol Pass 65+ vëgn anuzé da 47.206 seniors. „Nosc obietif é sëgn da lauré sön proiec nüs por amplié y otimisé l’oferta por garantí inant na rëi efiziënta dla mobilité publica te döta la Provinzia y por arjunje ince n target nü d’anuzadus poscibli“, insciö Mussner.
Ince sce la linia alta dla Val de Puster é stada sarada por ressanamënc al infrastrotöra tratan l’isté y cun l’arjunta de n lim de anuzadus tles trates plü anuzades, él impó gnü a se le dé n aumënt dles oblitearaziuns. „Nosc obietif resta inant da amplié la mobilité publica, dantadöt por ci che reverda la ferata y i mesi de trasport sostenibls“, ajuntëia l’assessur Mussner. La maiú pert dles obliteraziuns é gnüda registrada sön les corieres publiches (41,8 miliuns). La pert cun l’aumënt plü alt é gnüda a se le dé dales furnadoies cun n ampliamënt de 10,3 porcënt dles obliteraziuns cun indöt 1,7 miliuns de anuzadus. 9,8 miliuns de obliteraziuns é gnüdes registrades sön les trates feroviares.
Dac interessanc
401 viajadus á registré tratan l’ann 2016 indöt sura 20.000 chilometri de iade y pó spo anuzé le Südtirol Pass debann
56.230 é i chilometri dla porsona che s’á anuzé le plü sovënz dl Südtirol Pass
700.247 chilometri vëgn registrá mesamënter da düc i anuzadus dl Südtirol Pass
217.747 é stades les obliteraziuns ai 7 de setëmber dl 2016 sön i mesi dl trasport publich südtirolej. Chësc é sté le valur plü alt dl ann
146.028 obliteraziuns vëgnel registré mesamënter al de ti mesi dl trasport südtirolej
usp
