Atualità
Biatlon: Brom por Runggaldier, complimënc dala Junta
Mondiai de Biatlon a Hochfilzen: la biatleta ladina davagna la medaia de brom pro la gara de 15 chilometri. Congratulaziuns da Kompatscher, Stocker y Mussner.
Do i resultac ezelënc arjunc a Antholz cun n terzo y n sesto post á la jona de 25 agn Alexia Runggaldier arjunt incö ai 15 de jená le punt plü alt de süa cariera ciamó jona. Do les atletes internazionales Laura Dahlmeier (Or) y Gabriela Koukalova (Arjënt) á Runggaldier arjunt la medaia de brom tla gara individuala de 15 chilometri ai campionac mondiai de Biatlon a Hochfilzen. „A inom dla Junta provinziala y de düc i südtirolej orun ti fá nüsc complimënc a Alexia. Al se trata de n resultat straordinar, che desmostra i vari inant che ara á fat te n sport che ne se damana nia ma capazités fisiches y tecniches, mo dantadöt ince mentales“, comentëia le presidënt Arno Kompatscher, l’assessuria por le sport Martha Stocker y l’assessur ladin Florian Mussner. „Por merit de na buna colaboraziun danter atlec, tecnics y suranstanc y dles strotöres presëntes tla Provinzia é le Südtirol deventé öna dles cönes de chësc sport che apascionëia y che nes scinca na seria de sodesfaziuns y emoziuns“, insciö la nota di componënc dla Junta.
usp
