Atualità
Sorvisc volontar: 370 posć por le 2017
La Junta provinziala mët a desposiziun indöt 1,5 miliuns de euro por i trëi sorvisc volontars – por posć nüs y arlungiamënc.
Gran é l’interes di südtirolej da tó pert al program de sorvisc zivil volontar, sciöche al desmostra ince les zifres: 471 é stades les domandes tl 2016, de chëstes é 400 gnüdes aprovades dala Provinzia. L’aiüt da pert di volontars vëgn dër aprijé dales organisaziuns zënza fin de davagn (Onlus) che ne podess zënza chisc aiüc nia garantí sü sorvisc a bëgn dla popolaziun. La Provinzia ti mët a desposiziun di volontars na picia retüda dles spëises y regolamentëia le numer mascimal de posć nüs por ci che reverda les trëi categories che é: sorvisc zivil provinzial, sorvisc sozial volontar y sorvisc volontar da d’isté. Indöt mët la Junta a desposiziun por le 2017 1,5 miliuns de euro che é n aumënt dl 10 porcënt en confrunt al 2016, sciöche preodü dal program dl Ofize Chestiuns de cabinet dla Provinzia.
„La pröma categoria, le sorvisc zivil volontar dla Provinzia, é öna de nostes ressures plü importantes – y chëstes mëss gní aprijades y adorades“, dij le presidënt dla Provinzia Arno Kompatscher. Na pert dles ressurses por le 2017 vá a bëgn de sorvisc volontars che á metü man bele tl 2016. De setëmber dl 2016 él indöt 113 volontars nüs che á metü man cun so sorvisc y che pó fá sorvisc cina de setëmber dl 2017. Por volontars, che mëss avëi n’eté danter i 18 y i 28 agn, gnarál metü a desposiziun da d’altonn dl 2017 indöt 150 posć nüs. Sciöche davagn él preodü na retüda dles spëises de 450 euro y por le pröm iade pón ince chirí fora sce an ó fá n volontariat de 8 a 12 mëisc, cun almanco 30 ores al'edema. Le sorvisc zivil provinzial pó gní fat danter l'ater te ënc y assoziaziuns te chisc seturs: assistënza soziala y sanitara, reinserimënt sozial y intervënc d’emergënza, educaziun, sorvisc jogn y promoziun culturala, proteziun zivila, ativités dl tëmp lëde y de educaziun sportiva.
Ince por ci che reverda le sorvisc sozial volontar, che pó gni fat da porsones dai 29 agn insö, á la Junta amplié l’ann passé le numer di posć de indöt 120 unités cun indöt 165 volontars che fej le sorvisc atualmënter. Por chësc ann gnarál metü a desposiziun indöt 100 posć nüs. Sciöche davagn él preodü na retüda dles spëises dai 300 ai 400 euro al mëis aladô dles ores fates. „Dantadöt tl setur sozial vëgnel aprijé sce le sorvisc vëgn arlungé, ince deache i volontars á bele fat esperiënzes“, spliga le presidënt dla Provinzia.
Le sorvisc volontar da d’isté é ponsé por jogn y jones dai 15 ai 19 agn cun a desposiziun indöt 120 posć por le 2017. Le davagn é de 80 euro al’edema cun na dorada dales sis ales ot edemes. Chësc fej fora indöt 320 euro al mëis fajon le sorvisc por 30 ores al’edema.
Ales organisaziuns zënza fin de davagn ti vëgnel ince chësc ann damané da presenté proiec al Ofize Chestiuns de cabinet. Do l’aprovaziun di proiec é i interessá che pó ciafé les ofertes sön la plata internet aposta, olache al vëgn ince publiché i termins. Por le sorvisc volontar tratan les vacanzes él poscibl da fá domanda cina ai 31 de ma dl 2017.
usp
