Atualità
Dala Junta: economia, inovaziun y films
Löm vërda dala Junta por le Program provinzial 2017 por l’archirida y l’inovaziun, por sis laboratori nüs tl Parch tecnologich y por la promoziun di films.
La Junta provinziala á aprové incö le Program provinzial 2017 por l’archirida y l’inovaziun cun de plü finanziamënc che vëgn a se le dé por ti dé na sbürla ai prozesc d’inovaziun: danter les mosöres él conveziuns cun istituc d’archirida, la promoziun dla mobilité di scienziá, le sostëgn a ënc de formaziun, la consulënza tl setur dl’inovaziun, bandides por impreses inovatives nöies, bandides por proiec de cooperaziun y cluster. Le program 2017, á recordé le presidënt Kompatscher, prevëiga n impëgn finanziar de indöt 78 miliuns de euro a bëgn dles istituziuns d’archirida: Université; EURAC; IIT; Fraunhofer Italia y Ecoresearch. N capitul important é le Parch tecnologich che gnará inaudé le proscim ann da d’altonn. Danter les novités importantes por le 2017 él ince la realisaziun de na convenziun cun Ecoresearch, aziënda che fej proiec scientifics tl ciamp dl tratamënt dles eghes y dla contaminaziun dl’aria en colaboraziun cun d‘atri zëntri d’archirida y adöm cun l’Aziënda sanitara provinziala.
Löm vërda dala Junta provinziala ala realisaziun de 6 laboratori dl’Agenzia por l’ambiënt y por la Laimburg tl Parch tecnologich a Balsan por indöt 150 posć de laur. Preodü él la realisaziun de sis laboratori provinziai cun na spersa de indöt 10.592 metri cuadrac y n volum de 45 mile metri cubics. Insciö ará süa sënta tl NOI la direziun dl’Agenzia provinziala por l’ambiënt, le laboratore dl’analisa dl’ega, le laboratore dl‘analisa di alimënc, le laboratore de chimica fisica y le laboratore de biologia. Dala Laimburg passará al NOI le laboratore dles mangiaries y le laboratore de cern-cioce y che se fistidia dla segurëza alimentara y dla indicaziun dla provegnënza tipica y de chestiuns tecnologiches. Implü ará ince süa sënta tl Parch tecnologich firmes d’ezelënza privates y les cater istituziuns d’archirida dla Université da Balsan, l’Academia europeica de Balsan (EURAC), le Fraunhofer Innovatiun Engineering Center (IEC) y l’Agenzia CiasaClima che ti conzedará da lauré te na relaziun strënta cun les aziëndes. „Le parch tecnologich sará n proiet strategich por nosc teritore, che ampliará la competitivité dles istituziuns y de döt le raiun economich südtirolej, dantadöt ti seturs dl’inovaziun, dl’archirida, dla formaziun y dl svilup economich“, insciö le presidënt Kompatscher.
Implü á la Junta provinziala aprové incö la pröma pert di finanziamënc 2017 por le sostëgn di films y documentars che vëgn realisá tl Südtirol. I esperc y la IDM Südtirol, l’Aziënda speziala por l’economia, á stabilí da sostigní indöt 6 proiec tres le Fonds südtirolej por les produziuns. La condiziun por ciafé n finanziamënt publich é chëra che les produziuns televisives y cinematografiches reinvestësces tl Südtirol almanco le 150 porcënt de chël che ai á ciafé. La Junta provinziala á aprové, sön la basa de na valutaziun dla comisciun d’esperc y dla IDM, da finanzié 6 produziuns cun zirca 1,35 miliuns de euro indöt. La retüda economica söl teritore di 5 proiec, á recordé le presidënt Kompatscher, é stimada sön n davagn de 2,15 miliuns de euro. Al é preodü indöt 82 dis de produziun tl Südtirol cun l’adoranza di aturs, esperc de film y fornidus locai de sorvisc. Öna dles produziuns finanziades é südtiroleja, döes dal rest dla Talia y öna dal’Austria y dala Germania.
USP
Galaria dales fotografies
