Atualità
Museum Ladin: program rich de scomenciadies tratan l‘isté
Tratan messé y agost él le Museum Ladin che organisëia na seria de scomenciadies y escursciuns por descurí les Dolomites, la cultura ladina y l’Ursus ladinicus.
Escursciuns por descurí les Dolomites y süa geologia, la Val di Murins y l’Ursus ladinicus, la laurs che á viüt dan da 40.000 agn: chëstes sará ma na pert dles scomenciadies che le Museum Ladin Ciastel de Tor mët da jí tratan l’isté por pici y gragn. Te lugio y agost gnarál organisé de plü scomenciadies y apuntamënc cun tematiches desvalies.
La geologia dles Dolomites sará tl zënter dles escursciuns acompagnades tl Parch natural Pöz-Odles tres n percurs geologich tles vijinanzes dl Sas de Pütia che gnará a se le dé vigni mertesc de lugio y agost (ater co ai 15 d’agost). An s’incuntará dles 14.30 pro la plaza da parchené de Börz por jí adöm zirca trëi ores. La partezipaziun costa set euro. Prenotaziuns pro le Museum Ladin, tel. 0474/524020 o ince pro les assoziaziuns turistichesc dla Val Badia.
Vigni mercui dales 14.30 ales 16 gnarál indere organisé na roda acompagnada tla Val di Morins da Lungiarü. La spazirada pëia ia dala plaza de dlijia de Lungiarü y la partezipaziun costa cinch euro. Prenotaziuns pro le Museum Ladin, tel. 0474/524020. Implü vëgnel ince metü a jí vigni mercui dales 16.45 ales 19 n domisdé por mituns y mitans tl Museum Ladin Ursus ladinicus a San Ciascian cun scomenciadies de aorela cörta desvalies. Al pó se scrí ite mituns dai 5 ai 12 agn. La partezipaziun costa cinch euro. Prenotaziuns pro l’Assoziaziun turistica de San Ciascian al numer 0474/849422. Tl Museum Ladin a San Martin vëgnel ince pité la poscibilité por mituns da fá ativités didatiches vigni jöbia de lugio y agost dales 10.30 ales 12. La partezipaziun costa cinch euro. Prenotaziuns pro le Museum Ladin, tel. 0474/524020.
Por rové al ander de Conturines, le lüch olache Willy Costamoling á ciafé restli dla laurs di andri Ursus ladinicus, gnarál organisé vigni jöbia escursciuns acompagnades de na dorada de set ores adöm ai colaboradus dl Parch natural. N’atraziun particolara é inann l’istalaziun artistica de Lois Anvidalfarei. Le post d’incuntada sará ala Capanna Alpina dales 08.30. La partezipaziun costa set euro. Prenotaziuns pro dötes les assoziaziuns turistiches dla Val Badia.
N apuntamënt tradizional dl Museum Ladin resta le percurs geologich de Bula. L’escursciun cun le paleontologh dl Museum Ladin Herwig Prinoth gnará a se le dé vigni vëndres dales 14 ales 18. An s’incunta dales 14 dan l’Assoziaziun turistica de Urtijëi. L’escursciun costa 15 euro, prenotaziuns pro l’assoziaziun turistica al numer 0471/777600 o pro le Museum tel. 0474/524020.
USP
Galaria dales fotografies
(FOTO: Museum Ladin)
