Atualità
Prener, Kompatscher: „Situaziun sot a control“
Tuta de posiziun dl presidënt dla Provinzia por ci che reverda les anunzies dl’Austria da atué mosöres straordinares de control sön le confin dl Prener.
![](/news/img/lazy.gif)
Do l’anunzia dl Minister dla defenüda austriach, Hans Peter Doskozil, da orëi renforzé i controi sön le confin dl Stat sön le Prener, adoran ince i mesi dl militer, en previjiun de n aumënt poscibl de muciadus che röia sön le Prener, él ince le presidënt dla Provinzia de Balsan, Arno Kompatscher, che á tut posiziun sön la chestiun. Le presidënt Kompatscher sotlignëia che “chësta noela ne é pordërt degöna novité. Le fat che al é gnü fat de plü anunzies che reverda mosöres plü frëmes sön le Prener é na conseguënza dles lites politiches austriaches che gnará a se le dé da d’altonn”. Kompatscher spliga che “bele tl tëmp passé él sté Viena che á de plü iadi comuniché da orëi fá na seria de intervënc de preparaziun a n sistem plü frëm de controi sön i confins.”
Le presidënt dla Provinzia ajuntëia che “la tematica é tres atuala canche al vëgn a se le dé n aumënt de spostamënc di muciadus dal Mer Mediteran cuntra l’Europa. Implü él la Talia che á fat na domanda de plü solidarieté a livel europeich. La sitaziun atuala sön le Prener por le momënt é dötadöm calma, al ne vëgn nia segnalé de gran zifres de passaji ilegai, y an ne dess nia desmentié che l’Uniun europeica ne á nia autorisé controi che vá sura les normes de Schengen fora: daite da chësta cornisc iuridica vëgnel bele a se le dé controi che funzionëia bun ince por mirit dla buna colaboraziun danter Talia y Austria
USP