Atualità
Descurí les Dolomites tl chit: start de #dolomitesvives
L’alpinist Reinhold Messner á daurí ai 5 de messé la scomenciadia de Dolomitesvives söl ju dl Sela adöm ai assessurs Mussner, Theiner y Gilmozzi.
Söl menüt avisa dales 9 él gnü stlüt i azesc al ju dl Sela, les corieres é gnüdes potenziades por trasporté les porsones dai zëntri di paisc söl ju y le tëmp cun temperatöres cialdines á ince daidé para pro la pröma tapa dla scomenciadia #dolomitesvives ai 5 de lugio. Tratan i mëisc de lugio y agost restará le ju dl Sela ma davert por veicui eletrics, rodes y peduns por rajuns de sconanza ambientala. Sön la pert südtiroleja é la strada sarada dal bivio Miramonti inant dales 09.00 ales 16.00 por veicui a ciarburant y diesel.
Pröma tapa cun l’alpinist Reinhold Messner
Incö ai 5 de messé él gnü a se le dé la pröma tapa de #dolomitesvives cun l’alpinist Reinhold Messner che á rajoné tla cité dles peres sön le Ju dl Sela dl’importanza dla scomenciadia ince por ci che reverda la sconanza dl ambiënt y di raiuns de munt sensibls sciöche les Dolomites.„Da jí a pe o cun la roda ne é nia ma sann, mo an ciafa ince döta n’atra vijiun dles Dolomites che á n aspet dër particolar che pó ma gní descurí tl chit y smendrin la velozité”, á dit Messner recordan che le chit sará n valur important ince por l’economia turistica dles Dolomites, che podará se presenté sciöche n raiun turistich desfarënt dai atri.
L’assessur por la mobilité Florian Mussner s’á mostré contënt che an á podü pié ia cun le pröm proiet de limitaziun dl trafich söi jus por na mobilité plü sostenibla de sconanza ambientala. “Le messaje de incö é che le ju dl Sela ne é nia stlüt, mo davert por veicui eletrics y implü él gnü renforzé i coliamënc dl trasport publich cun corieres che röia söl ju dl Sela da Fascia y da Gherdëna vigni 15 menüc”, recorda l’assessur Mussner. Por l’ocajiun á ’assessur por l’ambiënt Richard Theiner orü rengrazié düc chi che s’á fistidié por atué mosöres concretes de sensibilisaziun ambientala, dantadöt do la detlaraziun dles Dolomites sciöche bëgn imaterial UNESCO. “Les generaziuns che vëgn docá dess arpé les Dolomites sciöche ares é atualmënter por podëi s’anuzé de chësta beliscima natöra y contrada”, insciö Theiner. Porchël gnarál ince fat n monitoring dles emisciuns, recorda Theiner. Por l’assessur ala mobilité y al ambiënt Mauro Gilmozzi é la iniziativa de dolomitesvives “n pice test por laure düc adöm, Provinzies, Comuns y assoziaziuns turistiches, y svilupé n model de mobilité y turism nü por revaluté nostes munts y nosta natöra.”
Le program de cornisc
Tratan les proscimes tapes de messé y agost gnarál organisé vigni mercui scomenciadies culturales y de aorela cörta cun tl zënter musiga, mangiaries y la cultura locala. Ai 12 de messé sarál la ota dla manifestaziun culinaria “Cook the mountains – Dolomites taste tour” te sis üties dl Trentin y dl Südtirol, ai 19 de messé sona le grup Hamilton De Holanda e Orquestra tl contest dl Südtirol Jazzfestival y ai 2 de agost spo sarál da aldí sonns dla tradiziun araba cun “Anouar Brahem”. Ai 9 de agost gnará söl ju dl Sela n valgügn personaji dl monn dl sport dl schi y dla roda, ai 16 de agost sonará y ciantará le trio ladin dles “Ganes” y ai 23 de agost spo gnarál organisé te na paladina naturala l’esibiziun dl’opera lirica ladinia “Aneta”. Implü organisëia la Fondaziun Dolomites Unesco vigni mercui dales 10 escursciuns geo treking por imparé da conësce la geologia dles DOlomites.
Colaboraziun garatada
#dolomitesvives é n proiet de colaboraziun danter les Provinzies de Balsan y Trënt, adöm ala sozieté speziala por le turism IDM, ai Comuns de Sëlva y Cianacei, ales assoziaziuns turistiches de Ghërdena, dl’Alta Badia y de Fascia. Por ci che reverda la Provinzia á lauré para a #dolomitesvives i Departimënc Mobilité, Viabilité y Ambiënt.
USP
Galaria dales fotografies
