Atualità
Südtirol y i Grijuns: Cultura retoromana ince na tematica
La Junta provinziala dl Südtirol á incunté incö le govern dl Chantun Grischun sön le col Muottas Muragl por rajoné ince de cooperaziuns retoromanes.
De plü cooperaziuns y proiec da porté inant deboriada é gnüs tematisá incö, ai 6 de setëmber, tl contest de n’incuntada danter i governs dl Südtirol y chël dl “Chantun Grischun” a Samedan. L’incuntada anuala danter les döes juntes é oramai na tradiziun, en chësc ann él sté la “Regenza dal chantun Grischun” che á invié i colegs dl Südtirol sön le col Muottas Muragl. “I ún albü n’incuntada dër costrutiva y plajora sön de plü tematiches che reverda trames döes les regiuns y che ara vá da porté inant plü saurí deboriada”, á splighé le presidënt dla Provinzia Arno Kompatscher. Sciöche ejëmpli él le presidënt che á porté colaboraziuns ti seturs dla sanité y dla mobilité.
N punt important che dess gní aprofondí tres cooperaziuns é sté chël dla cultura y dla formaziun, dantadöt por ci che reverda ince la cultura retoromana, olache al podess gní a se le dé concursc leterars o artistics organisá deboriada, mostres o ince colaboraziuns scolastiches. Implü él gnü baié de istituí na coriera publica che passa vigni ora danter Mals y Zernez. N punt che gnará aprofondí sará ince chël de n coliamënt cun ferates inanter les döes regiuns. “Chiló él sëgn da studié i dac y le material coiü adöm por odëi ince les conseguënzes por l’economia y la mobilité”, á dit Kompatscher.
Por aumenté la cooperaziun ince ti seturs dla formaziun profescionala y tla formaziun duala dessel gní formé n grup de laur sciöche bele atualënter tl setur dla sanité ti raiuns rurai. Na tematica atocada dales döes juntes é ince stada chëra di muciadus y di muciadus sot ai 18 agn. Sön la chestiun dl lu ésun rová a öna che al é nezesciar da smendrí le livel de proteziun.
Tratan l’incuntada él ince sté meso por la Junta provinziala dl Südtirol da porvé fora n ejëmpl tradizional de mobilité sostenibla y dl tëmp lëde dla regiun: al se trata dla furnadoia che porta da Samedan cina söl col de Muottas Muragl (muotta vëgn dal retoroman y ó dí “col”). Ala sentada ál tut pert le presidënt Arno Kompatscher, l’assessuria Martha Stocker y i assessurs Richard Theiner, Christian Tommasini, Philipp Achammer, Florian Mussner, Arnold Schuler. Da pert dla “Regenza dal chantun Grischun” él stá presënc la presidënta Barbara Janom Steiner y i assessurs Mario Cavigelli, Jon Domenic Parolini, Martin Jäger y Christian Rathgeb.
USP
Galaria dales fotografies
