L assessëur Mussner anconta rapresentanc dla lies cultureles badiotes.
Usp – I rapresentanc dla lies cultureles sëuracumeneles de majera mpurtanza y la Uniun Maestri Ladins de Badia à l’ena passeda ancuntà l assessëur ladin Florian Mussner. La prioriteies dl’atività culturela dëssa tl proscimo tëmp ti ji ala sënta nueva per la lies cultureles sëuracumeneles, plu tëmp de trasmiscion tl radio y televijon ladina, la cumiscion per la furmazion di nsenianc ladins, la sënta destacheda dl Istitut Pedagogich Ladin tla Val Badia y la discuscion de basa sun la scola ladina.
L assessëur Mussner anconta rapresentanc dla lies cultureles badiotes.Al’ancunteda cun l Assessëur Ladin à nce tëut pert i rapresentanc dla Uniun Maestri Ladins Otto Moling und Claudia Canins, Werner Pescosta y Christian Ferdigg dla Union di Ladins y Lois Trebo per la lia di artisc dla Val Badia. L ie unì purtà dant chël che l lëur culturel se damanda per i proscimi ani. I rapresentanc dla lies cultureles se damanda de auzé l nseniamënt dl Ladin a doi ëura al’ena. Tla scoles prufesciuneles dla valedes ladines dëssel unì fat n nseniamënt paritetich sciche tl’autra scoles ladines. Mplù dëssa l Istitut Pedagogich ladin IPL giapé na sënta destacheda tla Val Badia. Te chësta ucajon iel unì purtà dant l’idea de mëter a disposizion nfurmazions sun la grupa de rujeneda Ladina ala scoles tudësces y talianes. I rapresentanc culturei udëssa nce de bon uedl sce l unissa metù sù n Istitut per Ladinistica tla Università de Bulsan y na cumiscion per la furmazion de nsenianc ladins. N autra pruposta ie stata chëla de aumenté l tëmp de trasmiscion per radio y televijion ladina tres na redazion ladina a pert. Mplù dëssel unì metù sù n’agenzia stampa ladina y na zaita ladina da uni dì. Per la lies sëuracumeneles iel unì presentà l bujën de na sënta. I rapresentanc ne se à po nia lascià to l’ucajion de damandé n majer sustëni per l proiet de na rujeneda unitera. Per chël che reverda cumiscions de majera mpurtanza dëssel nce vester rapresenteda la grupa de rujeneda ladina. Per ti unì ncontra al fenomenn che l vën jit a ste te d’autra valedes dëssel unì njenià de plu stieres publiches tla valedes ladines, nsci inant i rapresentanc culturei che se damanda nce l trilinguism per dutores y apotecri tla valedes ladines.
L Assessëur a respendù sun uni cuestion damandeda. La se trata purempò de mëter prioriteies, nscì la minonga de Mussner. De chësc viers al udù de bon uëdl la pruposta de se ancunté regularmënter un n iede al ann cun i rapresentanc dla lies cultureles ladines y cun la Uniun di Maestri Ladins per pudëi rujené sun obietives mpurtanc. La priorità à al mumënt la sënta per la lies cultureles, de plu tëmp de trasmiscion ladina, la cumiscion per la furmazion di nsenianc, la sënta destacheda dl IPL y la discuscion de basa sun la scola ladina, nscì l assessëur Mussner.
USP
Galaria dales fotografies
L assessëur Mussner anconta rapresentanc dla lies cultureles badiotes.
