Usp – Chëi che mantën si puscion tl respet dla natura unirà nce chëst ann premiei dala Union Europea y dala Ripartizion per Natura y Cuntreda. Per l sië de prei speres, prei da mont cun truepa ierbes defrëntes, prei y pastures da leresc, l nia vardé te palusc y l mantenimënt de arjëies veniel dat ora pesc’. Chëst ann possen nce damandé do l pest per la cura de bosc da castania y i prei cun lëns da versura sparpaniëi.
Sun prei nia cautei crëscel truepa ierbes y plantes. Chëstes ie na gran richëza per la cuntreda dl Südtirol y ti piëta l raion de vita a pavëi, saioc y d’autri nsec che viv ti prei. Per chësta rejon vëniel dal U.E. y dala Ripartizion per Natura y Cuntreda dat ora pesc’ a chëi che se mpënia a curé si puscions tl respet dla natura. Tl ann 2003 iel unì paià ora ndut 1,87 milion de Euro de pesc’ per l mantenimënt dla cutreda sota l’aministrazion dla Ripartizion per Natura y Cuntreda.
Chëi che à bele fat dumanda ti ani passei per n tel pest al mantenimënt dla cuntreda, muessa chëst ann me plu de jù la dumanda de renuvamënt ala Lia Provinziela di Paures. L nvit ai dis de udienza per chësta dumandes ie bele unì madà ora. Chëi che fej l prim iede dumada o a chëi che ie tumà l mpëni di cin ani, muëssa scrì ora i formulares damandei pra la stazion furestela de cumpetënza.
