La Consulta culturala ladina é rovada adöm ai 15 d’aurì tl Museum Ladin a San Martin por le pröm iade do la sentada costituënta cun so Presidënt Florian Mussner por tratè les domandes de finanziamënc ales uniuns. Aladô dl arat dla Consulta ciafarà les uniuns culturales ladines por ativité o investimënc 401.000 Euro. Por le proscimo ann gnaràl laurè fora n conzet nü por le finanziamënt dla cultura ladina.
La consulta ladina cun l assesseur MussnerDla Consulta culturala ladina fej pert Hubert Irsara y Bruno Senoner sciöche rapresentanc dles uniuns dla Val Badia y de Gherdëina, Lois Ellecosta y Hilda Sottara é gnüs nominà dala Junta provinziala, Presidënt dla Consulta é l’assessur ala cultura ladina Florian Mussner.
77 ê les domandes da tratè por l’ativité culturala dles uniuns y associaziuns ladines, valgünes de chëstes ê bele gnüdes tratades dala pröma sentada, 58 domandes é gnüdes ejaminades danü y por 41 uniuns él gnü conzedü n contribut, les atres è gnüdes refodades o renviades ala proscima sentada por na dezijiun. Les domandes refodades reverda suradöt uniuns che n’à nia sciöche so fin chël dl’ativité culturala. Insciö ne ciafarà les associaziuns turistiches nia contribuc por süa ativité ordinara.
La consulta ladina à ince tratè 36 domandes por investimënc’, por chi ch’al é gnü conzedü 63.756 Euro cina sëgn. I contribuc’ por investimënc’ reverda suradöt la cumpra de stumënc’ musicai, trohtes, aredamënt o injigns tecnics..
Implü à la Consulta ladina ince valuté les domandes de sosëgn ai artisc’: 13 artistes o artisc’ à albü fat domanda de n contribut por la publicaziun de n catalogh dles operes o por n stipendium de laûr.
Les propostes dla Consulta passarà sëgn tla Junta provinziala por la delibera d’aprovaziun di contribu c’. Dedô ciafarà les uniuns la comunicaziun sön le contribut conzedü.
Por le proscimo ann s’à la Consulta tut dant de laurè fora critêrs plü avisa de sciöche al dess gnì conzedü i contribu c’ ala cultura ladina. Al ne dess nia ma plü gnì conzedü contribuc’ «a plöia » por düc’, mo metü prioritês tleres. « La cultura ladina dess gnì revalutada y sostignüda do critêrs trasparënc’ che sotrissëia i aspec’ culturai y manco chi dl tëmp lëde », à dit l’assessur Florian Mussner.
