Atualità
Sumënciadives per smendrì l refudam
USP – L program dla campania de sensibilisazion per smendrì l refudam „Weniger ist mehr“ – „manco ie de plù“ ie da permò unì dat prò dala Jonta Provinziela. L Ufize gestion dl refudam dl’ Agenzia Provinziela per la Prutezion dl Ambient ha proietà na lingia de purvedimënc per sensibilisé la populazion sun i vantajes che porta l smendrì refudam. La scumënciadives ie urientedes a de plu grupes dla sozietà de uni età. Dantaprima ulëssen arjonjer i chemuns y la comuniteies raioneles, ma nce duta la lies, mutons, jëuni, la scoles y i consumadëures à sorissà l assessëur Michl Laimer. L fin ie chël che la sensibltà per l ambient giape plu pëis y a chësta maniera de smendrì la montes de refudam y de straverdé la risorses.
Cun scumënciadives atratives dëssa i consumadëures ma nce i produtëures unì motivei a se nuzé di vantages che porta na sensibltà nueva de viers dl ambiënt. L ufize gestion dl refudam à njenià na plata tl internet sota l adres www.provinz.bz.it/trend, te chëla che l vën dat cunsëies cun vel bon fortl per smëndrì l refudam y l vën ncé presentà l’azions per avei manco refudam. Mplù vëniel pità n marcià de sgonda man tres chël che n possa cumpré y vënder, ma nce scinché o baraté prudoc. L fin de chësta azion tl internet ie chël de purté la populazion a n pensé critich de viers dl consum y nscì de sparanië refudam. A livel de media vën l’azions a livel provinziel sustenides tres comunicac stampa, spots tl radio, de majeri placac y na lingia de placac sun la curieres, camions dal refudam y nscì inant. Duc i chemuns, la comuniteies raioneles y d’autra istituzions che fej pea, mët a disposizion si mesuns de trasport per publiché l’azions. Ëiles pieta nce diretamënter ti ridli o tla scoles l’azions ala jënt. Tl proiet „Trend-Büro“ se tratla per ejëmpl che i ufizies publics adrova papier y tinta dl recycling, spartian drët rigorëus l refudam. L Ufize gestion dl refudam dà pesc’per chësta scumënciadiva. Pra l’azion „Kinder gegen Müll“ se tratla de adaté la strutures da fé damat dla lies per la plazes de juech VKE y la lia „ARCI Ragazzi“ che les jude a schivé refudam. I mëndri sarà n ucajin de plu manifestazions tla ziteies i prutagonisc’ contra l refudam. Truep se aspieten dal proiet „Fest ohne Müll“. La Provinzia a njenià de plu mascins da lavé jù mobiles per ti unì ncontra a la gran montes de refudam de taieresc y goc da scirmé, pra festes plubliches y manifestazions. Urganisadëures possa se mpresté chësta mascins y scumencé n trend che dëssa se ji dl viers de taieresc y goc che n possa adurvé plu suvënz. Dan 8 ani iel bele unì metù sù la bola dl ambiënt „Umweltsiegel“. Ntant iel bele 58 butëighes de alimeteresc te dut Südtirol che tën pea pra chësta scumënciadiva de gran suzes. La butëighës muëssa tlo se mpenië a tenì ite regulamënc sciorfes per l ambient. Tl internet, sota www.provinz.bz.it/trend possen cialé do ulà che l ie da abiné chësta butëighes. Mplù iel tlo nce da abiné rizetes cun prudoc ecologiches o cun prudoc dl marcià rëidl. Mplù vëniel dat cunsëies y fortli sun co che n possa puzené la cësa cialan sun l ambient.USP
