Atualità

Scora / Cultura | 13.05.2004 | 17:33

L assessëur Mussner vijitea la scoles dla Val Badia

USP – A Al Plan de Mareo, La Pli, Rina y San Martin de Tor à l assessëur ladin Florian Mussner ncuei juebia, 13 de mei, vijità la scoles y scolines. La se à dantaldut tratà de rujené cun i diretëures, nesnianc y nce cun i sculeies nstësc sun l sviliup dla scola ladina.

A Al Plan à l Assessëur, cumpanià dala referënta Edith Ploner, l ispetëur Lois Ellecosta, l diretëur dla ripartizion per la scola y cultura ladina Alexander Prinoth, n iede ancuntà la diretëura Rosmarie Crazzolara y la coordinadëura de scolina Barbara Ties. Drët cuntënt ie l assessëur Mussner, y nsci nce i sculeis, cun la scolina de Al Plan che pieta drët na bela lerch ala trëi sezions. Per la scola elemetera y mesana se mbincen Al Plan bele da n struf na palestra. Cun i lëures per fé chësta palestra uniral mo metù man ntan chësc ann, à segurà Mussner.

A La Pli à la delegazion scolastica pudù vester presënta pra la giaurida dla plaza da fe damat nueva per la elementera y la scolina. 65 sculeis dl’elementera y 13 dla scolina à mustrà si lëgrëza per la plaza nueva purtan dant de plu raprejentazions. Tla pitla scola elementera de Rina iel 22 sculeies te tlasses metudes adum. Tlo iel unì rujenà cun i nsenianc sun i bujëns particuleres de te pitla scoles. N’amusfera drët familiera an nce pudù cunstaté tla scolina ulache i set mëndri se à presetà al assessëur te na maniera drët da ulëi bon.

Sun la cuestion dla trëi rujenedes, l mparé de plu rujenedes te families ulache l vën me rujenà una rujeneda nsci schiche i materiai de nseniamënt ie stai i argumënc dl’ancunteda tla scola elementera de San Martin de Tor. La majera scola tla pert bassa dla Val Badia ie la mesana de San Martin cun 127 sculeies. Tlo iel pra la vijita dantaldut unì rujenà cun i sculeies y nsenianc sun daunì do la mesana. Per l assessëur Mussner ie la vijita tla scoles y scolines ladines de gran mpurtanza per pudëi ti unì ncontra mo miec ala esigënzes particuleres dla strutures y per audì la minonghes de nsenianc, educatëures y di sculeies nstësc.

Duman jirà la vijites inant a La Ila, San Ciascian y a Badia.

USP

Galaria dales fotografies