Atualità

Frabiché | 03.06.2004 | 17:32

Giaurida dla ntreda nueva a Tluses

USP – La ntreda nueva dla pitla zità de Tluses a nord ie ncuei juebia, 3 de juni, unida giaurida ufizialmënter dal Presidënt dla Provinzia Durnwalder y l assessëur per lëures publics Mussner. Tres l ncrëusc che à custà 1,8 milions de Euro iel sën mesun raidé de viers de Bulsan canche n vën ora de zità a nord de Tluses.

Per l ntreda a nord de Tluses fovel unì presentà na lingia de proiec. „La soluzion che n à cuncretisà ie na puscibltà drët scëmpla y a priesc che se adatea do la rata bën cun l raion“ à sorissà ncuei l assessëur Florian Mussner pra la giaurida. La streda dl Brëner ie unida spusteda de viers de Jevun. L ntreda de Tluses ie unida slargeda sëura l Isarch a forma de mes roda. „L muvimënt de streda vën regulà a la maniera tradiziunela che dà la puscibltà de frurné plu saurì ite y ora“ à spiegà Mussner. Cuntënt se à l presidënt Durnwalder mustrà che sën iel puscibl raidé dala ntreda nord de viers de Pesenon y nce de Bulsan. Paroles de lauda an abù per l proiet de Siegfried Seehauser, ma nce per la firma de costruzion PAC. Cun 1,8 milion de Euro iel stat mesun resté te na mesura de spëises da pudëi azeté à lecurdà Durnwalder y Mussner. Do la benediscion dl digan Gottfried Fuchs à i aministradëures de Provinzia y Chemun taià l pinta per giaurì ufizialmënter l ncrëusc. Per chësc lëur iel da pert de Jevun stat debujën de n parëi che arjonj a luesc n’autëza de 13 metri. Tlo an pudù adurvé di sasc che n à giavà ora per slargë la streda. Per l cialé ora uniral mo metù vel ciancel de lën su chël che possa crëscer plantes. De majera rëies dëssa straverdé dal pericul che tome jù sasc. De majera dificulteies an abù a stizé la pert dl crëusc sëura l ruf. Cun aiut de na crosa speziela an messé furé tl fonz cun n majer ntervënt per mëter jù de plu mircopei. La streda dala rodes dlongia l Isarch jù passa sota l ntreda nueva ora.

USP

Galaria dales fotografies