Prima senteda dla grupa de lëur „aucat per mutons y jëuni“
USP – L’istituzion de n aucat per mutons y jëuni ie for plu daujin. L assessëura Sabina Kasslatter Mur, che à giapà la ncëria dala Jonta provinziela de lauré ora n cunzet per mëter sun chësc aucat, à sën metù sù na grupa de lëur che se à ncuei, juebia 8 de lugio, ancuntà per l prim iëde. „La grupa de esperc dëssa judé a mëter mpé n cunzet che tol n cunsciderazion i bujëns de pusciblmënter truep mutons y jëuni“ à sorissà l’assessëura ncuei a Bulsan.
La prima senteda dla grupa de lëur „aucat per mutons y jëuni“La grupa de lëur „aucat per mutons y jëuni“ vën meneda dal diretëur dl ufize provinziel per i jëuni Klaus Nothdurfter. L’assessëures Kasslatter Mur y Gnecchi à cris persones cumpetëntes da plu ciamps de lëur, nsci ie unì cherdà Wilma Runggaldier (atività per i jëuni y cultura ladina), Lukas Plancker (ufize dl aucat provinziel), Gerhard Mair (ripartizion Soziel), Martha Stecher (servijes soziei de raioin), Marco Recla (cultura taliana), Edith Brugger Paggi (scola tudëscia y furmazon profesciunela) y Donatella Masera (furmazion profesciunela taliana). Dla grupa de lëur fej nce pert l’aucat populer Burgi Volgger y Michael Peer dla lia tët di jëuni, Südtiroler Jugendring. Dan mëter man cun l’atività, à l’assessëura Kasslatter Mur ncuei rengrazià l Südtiroler Jugendring per la preparazion fata danora. Lecurdan l program de coalizion dla Jonta provinziela à l’assesëura sorissà che l ie unì tëut n cunsciderazion che i mutons y i jëuni vën for de plu metui dan sfides dl tëmp nueves, che i giapa pusciblteies nueves, ma che i muessa nce for resië de plù. L aucat per mutons y jëuni dëssa vester tlo per judé a persones jëunes tl ti vester ala for majera dificulteies dl tëmp dal didancuei. Chësc aucat dëssa se mpenië per l bën y i nteresc di mutons y di jëuni. L ie dantaldut l Südtiroler Jugendring y la lia proviziela per la families a ti sté do a chësta istituzion nueva. L servij dëssa purté prò a miuré la cundizions de vita di jëuni te duc i ciamps. L aucat dëssa vester tlo per duc chëi che adrova aiut o nfurmazion, sibe mutons y jëuni, che nce i granc y la istituzions. L dëssa mplù nce rapresenté i jëuni sota dejdot ani te cuestions sozio-politiches, cialan de sensibilisé la sozietà per i problemes di mutons y di jëuni. Un di fins ie nce chël de ti dé plu parola ai jëuni te nosta sozietà. „L aucat per mutons y jëuni dëssa cialé de sensibilisé la minonga publica sun i dërc di mutons y di jëuni aldò dla cunvenzion per i dërc di mutons dla UNO“ à sorissa l’assessëura Kasslatter Mur. L duvier prinzipiel dl aucat dëssa vester chël de medié danter i nteresc di jëuni che se cuntestea.
La grupa de lëur nueva ne se dà nia me jù cun cuestions de dërt, ma nce cun la cumpetënzes, i duvieres dl aucat nuef. Te n sgondo mumënt dëssel pona unì stlarì la cuestions de denominazion y de strutura. L cunzet laurá ora dala grupa de cumpetënza ulëssa l assessëura Kasslatter Mur mo purté chësc ann te Jonta provinziela.
USP
Galaria dales fotografies
La prima senteda dla grupa de lëur „aucat per mutons y jëuni“
