Atualità
Iscriziuns tles scolines ladines
USP - I geniturs che ô scrì ite sü mituns o sües mitans te üna dles scolines ladines por l'ann 2005/2006 mëss se tó le tëmp por jì n dé dla proscima edema tla scolina de paisc. Les iscriziuns gnarà fates tl'edema dai 17 - 21 de jenà tles singules scolines.
Les iscriziuns por i mituns y les mitans nasciüs dan dai 31 de jenà 2003 podarà i scrì ite tla edema dai 17 - 21 de jenà por l'ann de scolina 2005/06, ti dis che vigni singula scolina fajarà fora y tacarà fora sön porta de scolina. Sciöche la direturia dles scolines Edith Ploner lascia al savëi, gnaràl fat te vigni scolina almanco dui dis de iscriziuns, te deplü scolines ince trëi dis. Gnì scric' ite pò i mituns y les mitans nasciüs dan dai 1 de setëmber dl 1999 cina ai 31 de jenà dl 2003.La novité pro chëstes iscriziuns é chëra che al po ince gnì damanè l'orar plü lunch de scolina da pert de chëres families che se le dejidrëia. "Sce al sarà mituns y mitans assà che se le damana, gnaràl ciarè da ti jì adincuntra a chëstes esigënzes", detlarëia l'assessur ala scora y scolina ladina Florian Mussner, a öna cun la direziun dles scolines.
USP
