Atualità

Escursciuns cun les rodes vëgn dër aprijades: porchël gnarál amplié ti fins dl’edema dl mëis de agost la linia dla ferata tla Alta Val de Puster cun cater iadi implü por ti jí adincuntra al numer plü alt de ziclisć che jará cun la ferata. „Cun chësta mosöra orunse ti dé na maiú lerch ai ziclisć y sostigní chësta forma de turism ecologich y sportif“, sotlignëia l’assessur Florian Mussner.

Euforia, podëi, impotënza y agonia é i temesc de na mostra speziala che gnará daurida ai 9 d’otober a Balsan, cun chëra che la Repartiziun Cultura ladina presentëia i avenimënc dla Gran Vera y la crudelté dla violënza en general te n’elaboraziun artistica nöia. Indöt gnarál mostré les operes d’ert di ot davagnadus dl concurs artistich da inann, che é gnüs chiris fora da püch.

Sce le mëis de messé, le plü cialt dal mëteman dles mosoraziuns, se röia cun n’aria frësca, gnará le cialt da d’isté indô a se fá sintí dai proscims dis cun temperatöres dër altes tl Südtirol che podará rové cina ai 35 degrá. Chësta la previjiun de Dieter Peterlin, le meterologh dl Sorvisc Meteo dla Provinzia.

Ciamó cina ai 15 de setëmber pó i abonamënc abo+ por scolars y studënc gní adorá. Por düc chi che ó renové l’abo+ por le proscim ann de scora o academich pó le fá online paian ince la cuota anuala dër comot dal computer. „Les domandes online funzionëia bun, ares pó gní manajades debota y ares smendrësc la burocrazia“, insciö l’assesur competënt Mussner.

Por sotligné l’ampliamënt dl’Autonomia dl Südtirol y la recuperada y metüda en segurëza dles competënzes dla Provinzia él intergnü incö ai 30 de messé le presidënt dla Provinzia Arno Kompatscher tratan n’audiënza dan la Comisciun parlamentara por les Regiuns. Implü á le presidënt ince sostigní so impëgn por l’aprovaziun dles normes d’atuaziun, por che le Südtirol pois ademplí sües responsabilités.

Les domandes online por la conzesciun de n stipendium de stüde y por la retüda dles tasses universitares por l’ann academich 2015/16 podará gní dades jö dai 3 de agost cina ai 30 d’otober dl 2015. Les bandides por i concursc é gnüs aprová dala Junta provinziala sön proposta dl presidënt dla Provinzia Arno Kompatscher.

„Do les tröpes discusciuns y le laur intensif di ultims mëisc pon dí che i sun sön na buna strada“, á sotligné l’assessur Richard Theiner incö tratan la conferënza stampa olache al é gnü presenté les diretives y i obietifs dla lege provinziala nöia che reverda l’urbanistica y la sconanza dla contrada. La Junta provinziala á aprové inier (28/07) la proposta portada dant dal assesur por l’ambiënt.

L’assessuria provinziala por la sanité Martha Stocker presentará, tl cheder de na conferënza stampa en vëndres, ai 31 de messé a Balsan, les diretives nöies por ci che reverda la fecondaziun artifiziala acompagnada da personal sanitar, che sará poscibla tl dagní ince tl Südtirol.

Löm vërda definitiva dala Junta provinziala ales diretives y ai obietifs dla lege nöia che prevëiga de plü mudaziuns ti seturs dl’urbanistica y dl paesaje. I detais dla proposta de lege nöia gnará presentá indoman (ai 29 de messé) tratan na conferënza stampa.

La Junta provinziala á tut incö (ai 28 de messé) la dezijiun da ti assegné al’Aziënda sanitara la soma de 300mile euro da investí por ativités de informaziun, prevenziun, sensibilisaziun y scombatimënt cuntra la dependënza dal jüch.