Atualità

Da incö, mertesc ai 16 de jügn cina en vëndres ai 19 de jügn dales 17.00 da sëra restará la strada provinziala 29 che coliëia Eores cun San Martin de Tor stlüta danter Antermëia y le Ju de Börz. Sön na trata de indöt 1,5 chilometri laora le Sorvisc Strades dla Val de Puster por ressané la strada.

Löm vërda por le ressanamënt dla pista por arsí y pié ia da Balsan, mo degun ampliamënt, cina d’otober presentaziun tl Consëi de na lege cun na strategia nöia y spo organisaziun de n referendum popolar. Chësc é le percurs presenté incö (16 de jügn) dal presidënt dla Provinzia Arno Kompatscher por ci che reverda le dagní dl aeroport da Balsan.

Por l’ann scolastich 2015/16 á la Junta provinziala planifiché na soma de 34,2 miliuns de euro sciöche mesi por le finanziamënt dl’assistënza scolastica. „Ma por mirit de n sostëgn adaté ai bojëgns dl’assistënza scolastica pól ince gní garantí i medemi dërc al’istruziun por düc“, sotlignëia l’assessur Philipp Achammer.

Garantí la pluralité dl’informaziun tl Südtirol: chësc é l’obietif prinzipal dla lege sön les telecomunicaziuns y sön les emitënzes privates che vá zoruch al 2002 y che é gnüda elaborada danü incö (16/06) dala Junta. Al é preodü n sistem nü y plü scëmpl cun alisiraziuns y n sostëgn finanziar anual de 1 n miliun de euro tl 2015 da ti assegné sciöche contribut ales emitënzes privates (ince online).

Pervia di svilups dla medejina generela che se porta pro tres ora y di bujëns dl personal medich iel stat debujën de adaté l program de furmazion prufescionela. Ntan la senteda da ncuei (16 de juni) à la Jonta provinziela apurvà la mudazions revardëntes la pert teorica y pratica.

La junta provinziala á metü incö (16 de jügn) les fondamëntes por lauré fora n plan provinzial por la prevenziun. “Sconé la sanité di zitadins tres na ativité de prevenziun che cür döt – á sotrissé l’assessuria Martha Stocker – rapresentëia un di pilastri dla reforma sanitara y á porchël la priorité”.

Ai 28 de ma dl 2015 é i laurs de recostruziun dl punt danter Lijun y Rungg tl Comun de Lijun al chilometer 13,60 dla strada provinziala 30 jüs a piz. Indöt á i laurs albü na dorada de n ann y á costé 917.757 euro.

Assistënc y assistëntes di mituns y mitans cun n titul de stüde südtirolej é dër damaná ince foradecá. Bele por le cuarto iade dal 2014 inant vëgnel organisé dal Zënter de mediaziun laur da Balsan n domisde d’informaziun por personal interessé a n post de laur tl Paiern o tla Germania. Le termin é ai 19 de jügn.

Cun incö (12/06) se röia por la maiú pert di scolars dles scores altes y profescionales l’ann de scora, por i mituns dles scolines y por i scolars dles scores elementares y mesanes sará l’ultim de de scora ai 16/06. Por la fin dl ann de scora ti fej i assessurs Mussner, Achammer y Tommasini a düc i scolars y dötes les scolares les mius aodanzes por de beles vacanzes y döt le bun por i ejams finai.

Le diretur general nü dl’Aziënda sanitara dl Südtirol Thomas Schäl metará man süa inciaria en lönesc, ai 15 de jügn. Incö, vëndres ai 12 de jügn s’ál presenté te na conferënza stampa ai media. „L’obietif é chël da condüj inant n sistem dla sanité che funzionëia bun y dal svilupé do les linies stabilides dala politica“, á sotligné Schäl.