Atualità

Le fonds metü sö cun la retüda de na pert dles ponsiuns di ex aconsiadus regionai portará pro a sostigní sides les families che le laur. La junta provinziala á aprové inier (ai 9 de jügn) na seria de proiec, che ti messará sëgn gní sotmetüs ala Regiun, por indöt 1,9 miliuns de euro: al salta al edl le contribut por l’aspetativa di peri.

Cun la fin dl ann scolastich vëgnel ince ajorné i orars di mesi dl trasport publich. Por podëi ti jí adincuntra a na presënza plü grana de passajiers sön les trates che porta a traverc de escurjiuns gnarál aumenté dai 21 de jügn i mesi de trasport publich tratan les ores de aorela cörta y ti fins dl’edema. De plü é ince les novités por les valades ladines.

La Junta provinziala á traté incö (ai 9 de jügn) la chestiun che reverda l’organisaziun dles strotöres d’acoliënza de migranc sön döt le teritore. La Junta á aprové na proposta dl’assessuria Martha Stocker che prevëiga la destribuiziun di migranc che damana do asil sön dötes les comunités comprensoriales dla Provinzia. La sora ezeziun é Balsan.

Le Südtirol y le Trentin renforzëia la colaboraziun por ci che reverda i contrac publics. La Junta provinziala á aprové incö (mertesc ai 9 de jügn), sön proposta dl presidënt Arno Kompatscher, n protocol d’acordanza che á sciöche obietif chël da smendrí i cosć y da mioré l’efiziënza dles prozedöres.

Tres plü daimpró röia por le Südtirol la gestiun autonoma dl parch nazional dl Stelvio. Do la sotescriziun dl’acordanza a Roma tl mëis de forá á la Junta provinziala aprové incö (ai 9 de jügn) n protocol d’acordanza danter le Südtirol y le Trentin che reverda la spartiziun te pertes anfat di cosć de gestiun.

La Junta provinziala á nominé incö (mertesc ai 9 de jügn) do na prozedöra de seleziun gnüda manajada da na comisciun d’esperc y sön proposta dl’assessuria por la sanité Martha Stocker le diretur general nü dl’Aziënda sanitara dl Südtirol. Al se trata de Thomas Schäl che tignará na conferënza stampa de presentaziun ai 12 de jügn.

Löm vërda dala Junta provinziala incö (mertesc ai 9 de jügn) ai critérs nüs por la conzesciun de alisiraziuns a bëgn dles imprejes de erës. Les domandes d’azes ales formes de sostëgn podará gní presentades dal 1 de lugio inant. „Cun chësta dezijiun ún indô daurí döt le sistem de sostëgn dl’economia“, á sotligné le presidënt Kompatscher.

Le presidënt Kompatscher tól at cun sodesfaziun dl svilup positif dl’ocupaziun y che é gnü confermé dai dac dl raport sön le marcé dl laur presenté inier. „Les statistiches nes confermëia che le svilup dl marcé dl laur südtirolej é positif y chësc é ince mirit dles mosöres atuades dal govern provinzial cun la creaziun de posć de laur nüs y la diminuziun dla presciun fiscala por le imprejes.“

482 porsones che á fat domanda do asil sojornëia atualmënter tles sis strotöres por i migranc tl Südtirol. Sön invit dl’assessuria por le sozial Martha Stocker á vijité sis aconsiadus dl Consëi provinzial incö, lönesc ai 8 de jügn, n valgönes dles strotöres d’acoliënza a Balsan y Maran por se fá n’idea generala dla situaziun atuala di migranc tl Südtirol.

Al é gnü presenté incö dal’assessuria Martha Stocker le raport sön le marcé dl laur tla Provinzia de Balsan che reverda la perioda dal novëmber 2014 al aurí 2015. Al é gnü registré n aumënt dl 0,8 porcënt dl’ocupaziun y na porcentuala de dejocupaziun de 4,6 porcënt, cun pröms segnai de chersciüda ti seturs dl turism y dl’agricoltöra cun le setur dl’edilizia che é ciamó en dificolté.