Atualità

Aprofondí les tematiches di conflic te süa aspec plü desvalies por renforzé l’importanza di valurs dla convivënza y dla pesc: chisc é stá i fins prinzipai di proiec culturai metüs a jí dala Repartiziun dla Cultura y Intendënza ladina tles scores mesanes y altes dla Val Badia y te Gherdëina y coordiná da Erika Castlunger.

Marion Piffer Damiani é gnüda reconfermada por i proscims trëi agn dala Junta provinziala te süa inciaria de presidënta dl Consëi de fondaziun dl Museion.

Le presidënt dla Provinzia Arno Kompatscher presentará, adöm cun i assessurs por la cultura Florian Mussner, Christian Tommasini y Philipp Achammer, en jöbia ai 2 de aurí a Balsan la ligna de scomenciadies che é söl program por i 100 agn passá dala Pröma Vera Mondiala (1914-1918).

Les Consultes di Jogn di grups linguistics ladin, todësch y talian s’á incunté incö, 26 de merz, a Balsan por na pröma sentada deboriada. „Sciöche ënc de consulënza dla Junta pro tematiches che reverda i jogn á les consultes na funziun importanta che dess tl dagní gní portada inant tres de plü te na manira coletiva“, á sotligné i assessurs Florian Mussner, Christian Tommasini y Philipp Achammer.

I proiec concordá dala Provinzia y dal CONI por favorí le sport dl Südtirol y le finanziamënt dles strotöres sportives é stades al zënter dla pröma sentada dla comisciun paritetica nöia danter la Provinzia y le Comitê olimpich nazional talian, che á l’inciaria fina l’ann 2018.

Le Sorvisc Strades dla Val de Puster metará man te püch cun la manutenziun straordinara dles strades. Por i intervënc sön les strades provinziales vëgnel metü a desposiziun 1,29 miliuns de euro, por les strades statales indöt 1,68 miliuns de euro. „Cun i laurs de manutenziun y metüda en segurëza orunse ti pité ai zitadins strades plü sigüdes“, dij l’assessur Florian Mussner.

L’area unica por i paiamënc te euro (SEPA), le percurs d’informaziun sot al Monumënt ala Vitoria a Balsan y le professur trentin Giuseppe Zorzi: chisc é i temesc dl mëis presënc, te na forma multimediala, sön la homepage dl’Euregio sot ala misciun: www.europaregion.info.

Le Südtirol ará la poscibilité da trá l’atenziun de miluns de vijitadus al EXPO 2015 por merit de n stand aposta, che vëgn metü adöm chisc dis y cun chël che an presentará ince i produc de cualité (dai pom al cioce, vins, ordöra, sperjes, pirieres, produc de lat, erbes yii) dla gastronomia südtiroleja.

I programs anuai ti seturs di laûrs publics y dles infrastrotöres y la spartiziun dles ressurses metüdes tl bilanz ti seturs dla sanité, dl sozial, dla familia y dl frabiché abitatif sarà les tematiches prinzipales dla sentada de tlausöra dla Junta provinziala en vëndres ai 27 de merz.

Le proiet de renovamënt dl’aministraziun provinziala reverda inće le web. Al é tl jì online chëstes ores la verjiun nöia www.provinzia.bz.it, le portal nü che sostituësc la Rëi zivica, che arà na misciun nöia. Le proiet porta para na homepage nöia, n motor de chirida plü sterch, na navigaziun plü scëmpla y direta cun 15 plates tematiches che ti va adincuntra ales esigënzes di zitadins.