Atualità

Produzions de televijion per ladin finanziedes dala Provinzia da udëi per duc: chësta puscibltà vën śën data tres internet sun l canal Youtube dla Provinzia de Bulsan (www.youtube.com/ProvinziaBulsan). La plataforma video à aldò dl assessëur Mussner doi fins primeres: “Tres la plataforma nueva vëniel mustrà su la mendranza ladina sun n canal nternaziunel y pità trasparënza sun proiec finanziei dala Provinzia”.

L medemo spirt, i medemi fins y la medema grupes de referimënt: l minister per l lëur, Enrico Giovannini à (NCUEI) ai 10 de setëmber pra n cunvëni a Bulsan sorissa tant che l program per l lëur dla Jonta provinziela ti semieia a chël dl Stat. Purempò se à i assessëures Roberto Bizzo y Sabina Kasslatter Mur damandà dal Stat plu lerch de muvimënt per vester bon de ti tenì permez ala dejocupazion.

A Al Plan de Mareo él gnü stlüt jö en domënia la formaziun da junior ranger. I pici ranger à podü pié do le diplom de junior ranger di parcs naturai dl Sudtirol dai colaboradus dl parch natural y dai rapresentanć dla Lia da Munt Ladinia Val Badia.

Cun la fin dla sajun da d’isté va inant i laûrs por l’internet aslöm tla Val Badia. Chisc dis metaràn man da mëte jö i rôs danter Picolin y La Ila. “I laûrs reverda i rôs ćina a La Ila, daldô gnaràl atira trat tres les fires otiches”, à dit l’assessur Florian Mussner.

For plu persones se stënta nce tl Sudtirol a abiné da lëur. La Jonta provinziela ie tl lëur traté chësta problematica y per la grupa de rujeneda ladina iel mo pusciblteies de stieres publiches, dantaprima tl ciamp dla Sanità: aldò dl pruporz ti spieta ala grupa de rujeneda ladina tlo mo 160 stieres. Acioche chësta stieres possa nce unì curides da jënt ladina, fej l assessëur ladin Florian Mussner n apel de fé pea i cuncorsc per stieres tla Sanità.

Cun l’ejam de matura à chëst ann 61 jëuni finà via si furmazion tla scoles autes ladines. Chësc var mpurtant tla vita di jëuni vën n vënderdi ai 13 de setëmber festejà cun n pitl recunescimënt da pert dl assessëur ala scoles ladines Florian Mussner y dl ntendënt Roland Verra.

Te me doi ëura à la Jonta provinziela (NCUEI) ai 9 de setëmber tëut na lingia de dezijions che va dala problematica di zënza lëur, ala veles tres lëtra, nsenianc, paures y partizions turistiches. Rejon dla senteda curta dla Jonta ie na senteda straurdinera dl Cunsëi provinziel.

Nsenianc che se anjenià al ejam per l’abilitazion de nsenië, puderà giapé feries de furmazion. La Jonta provinziela à (NCUEI) ai 9 de setëmber, dlongia chësta dezijion nce fat ora de auzé i paiamënc per paures y de valivé la tlassificazion de stëiles, ciofs y surëdli tl turism.

Pra la veles provinzieles ai 27 de utober puderà i zitadins dl Sudtirol che vif oradecà chëst ann per l prim iede lité tres lëtra. Aldò dla lege dëssa chësta puscibltà nce unì data ai zitadins che vif tl Sudtirol, ma che ne sarà l di dla veles nia a cësa. Davia che la problematica reverda de plu regulamënc y nterpretazions de lege ie la dezijions sun la pruzedures unida data inant ala cumiscion de vela.

L Tirol dl Nord y Sudtirol sëurandà ann per ann uneranzes a persunajes che se à fat merit. Sun pruposta dl presidënt dl Tirol Günther Platter à la Jonta provinziela de Bulsan dat pro de plu mudazions ai criteries de sëurandata. Tl daunì dëssa chësta uneranzes nce pudëi unì sëurandates a zitadins de rujeneda taliana.