Atualità

USP - Per cialé do che i cuatieres cunvenzionei vënie nce nuzei da jënt cun residënza, che ne à nia mo cuatieres, dëssel unì njenià n’agenzia de cuntrol a livel provinziel. La Jonta provinziela à (NCUEI) ai 18 de merz nciarià l assessëur Tommasini de tò su cuntat cun l’Assoziazion di chemuns per nvië via na tel agenzia.

USP – Sculeies che fina chëst ann la scola mesana possa nchin ala fin de merz mo se scrì ite a na scola auta. A chiche ne à mo nia tëut na dezijion ti mët l assessëur ladin Mussner a cuer de se de jù plu avisa cun cie che l vën pità. Tla valedes ladines possen crì ora sies scoles autes: doi istituc tecnics economics, n lizeum linguistich, n lizeum pedagogich, n lizeum d’ert y na scola prufesciunela.

USP – Pra i campiunac dl mond de jadinè artistich à Carolina Kostner venciù la bedaia d’arjënt. Per chësc suzes straurdiner ti manda l presidënt dla Provinzia Luis Durnwalder y l assessëur ladin Florian Mussner i miëur auguresc: „Cun l titul da vizecampiunëssa dl mond à Carolina Kostner inò demustrà si gran capaziteies, purtan unëur al Südtirol y ala valedes ladines“.

USP – Ai 5 de dezëmber fovel unì giaurì la Rë zivica dla Provinzia de Bulsan nce tla rujeneda ladina. La bilanz di prim 100 dis (ai 15 de merz) mostra su che l ie nteres per l portal de nfurmazion tla rujeneda ladina y che la populazion ladina a scumencià a se usé dl servisc de nutizies, di servijes dl’aministrazion publica y dla banches dac. Drët vijitedes ie nce la previjions meteo tla rujeneda ladina.

USP – Per mparé a cunëscer co che vën purtà inant la rë dl internet aslune tl Südtirol à na delegazion dl ciamp economich dla Stiria n lunesc ai 12 de merz ancuntà l asssessëur provinziel Florian Mussner a Bulsan. Per i reprejentanc dal’Austria se tratovel dantaprima de mparé dal’esperienza tl Assessorat ai lëures publics ajache ëi ulëssa ënghe mëter a jì na tel rë.

L program de pruvedimënc acioche jëuni zënza lëur ruve pra na stiera, la unificazion di sistems informatics per dl’aministrazion publica dala Provinzia nchin ai chemuns y l paië do de cuntribuc mpermetui a pendolares ie stai i ponc de majer nteres tratei dala Jonta provinziela y prejentei dal presidënt Durnwalder te cunferënza stampa.

USP – Pendolares che ova damandà n cuntribut dala Provinzia dëssa prësc giapé si pert mpermetuda. Per dumandes nueves unirà i criteries laurei ora da nuef.

USP – Per pudëi lauré cun la medema nfurmazions y per se baraté ora i dac, uniral metù a jì n sistem informatich unificà danter Provinzia, spediei, cumuniteies raioneles y chemuns. Per chësc mpëni à la Jonta provinziela (NCUEI) ai 11 de merz dat pro de aumenté l capital dla sozietà de nfurmatica SIAG.

USP – Te chësc mumënt iel tl Südtirol 11,6 percënt di jëuni zënza lëur. Per ti judé ai jëuni a abiné na stiera à la Jonta provinziela (NCUEI) ai 11 de merz dat pro n program de set ponc y n finanziamënt de na milion de euro. Aldò de ultima cumpededes iel tl Südtirol 626 jëuni sota 30 ani zënza lëur y che ti mancia cumpetënzes per abiné na stiera.

USP – La scuadra de Fascia à venciù la cuarta edizion dl turnoi de hockey per sculeies dla mesanes ladines. L’ancunteda sportiva danter la cin valedes ladines dla Dolomites a Alie (Alleghe) à purtà pro a miuré i cuntac danter la scoles y a n mparé a se cunëscer miec danter sculeies.