Atualità

USP – Cun na strategia per n tëmp plu lonch uel la Jonta provinziela fé devënte l Südtirol na provinzia-tlima. Nchin tl 2050 uelen arbassé l emiscion de CO2 da 5 a 1,5 tones per persona al ann y curì nstës l bujën de energia.

USP - La Jonta provinziela à dat pro la furmazion dla tlasses y la cumpëida de nsenianc tla scoles dla trëi grupes de rujeneda. Tla valedes ladines, cun si pitli luesc uniral fat tlasses cun manco sculeies permez ala scoles ti majeri luesc y tla ziteies.

USP – Per avëi plu mesuns a desposizion da frabiché stredes, strutures y cuatieres à la Jonta provinziela tratà la puscibltà de vënder puscions che ne vën nia adurvedes. L presidënt dla provinzia fej cont te tré ite a chësta maniera passa 100 milion de euro da pudëi adurvé per strutures mpurtantes che n ne uel nia lascé aspité.

USP – Da n merdi ai 10 nchin juebia 12 de mei de nuet, puderan ti tuniei de S.Cristina me passé te na direzion al iede.

USP – 45 museums y abinedes tën n dumënia che vën, ai 15 de mei l di nternaziunel di museums. Gran pert pieta la ntreda debant y na vela de ativiteies. Danter i truep museums che tën pea chësc di nternaziunel iel nce l Museum Ladin y l Museum de Gherdëina.

USP - La ntegrazion de sculeies che vën da families imigrantes se damanda n gran lëur pedagogich. Tla scoles ladines ie chësta ntegrazion mo plu mpeniativa davia che la mutans y i mutons de imigranc muessa unì alfabetisei no me te una, ma te trëi rujenedes.

L’Euregio Tirol-Südtirol-Trentino sciche cunlianza teritoriela possa deventé istituzion. Ai 3 de mei (NCUEI) à l presidënt dla Provinzia de Bulsan giapà la comunicazion dala Presidënza di Ministri a Roma che l possa unì metù su l’Euregio sciche grupa europea de culaburazion teritoriela (EVTZ: Europäischer Verbund territorialer Zusammenarbeit).

USP – Nchin ala fin de mei possa duc i nteressei mandé ite stories adatedes a jëuni y jëunes per l cuncors de leteratura ladina scrit ora dal Ufize provinziel per la Cultura Ladina. Cun pesc’ per na soma de 6.000 euro y la publicazion di scric te n liber sustën la Provinzia de Bulsan l scrì tla rujeneda ladina.

Argumënc de carater storich ie ncuei (2 de mei) stai la pert zentrela dla senteda dla Jonta provinziela. Tla cunferënza stampa à l presidënt Durnwalder cunedì la soluzion per curì ju l relief de Mussolini a Bulsan, che l ie unì metù su la prima tofles pra i ossares y che per i 50 ani dala nuet di fuesc, uniral tenì na manifestazion de descuscion. I assessëures provinziei à nce tëut na dezijion n cont de scrì ora lëures publics, cuatieres ti zëntri di luesc y l servisc “info Tv”.

USP – A Gossensaß iel (NCUEI) ai 2 de mei unì metù su la prima tofles per spieghé ciuldì che l fova unì fat i ossares. Ntan i proscimi dis uniral nce metù su la tofles a Mals, per Sanciana/Innichen mancel mo la lizënza.