Atualità

USP- L assessëur Florian Mussner se à inier (11 merz) ancuntà cun la presidënta nueva dla Union di Ladins de Fodom y l presidënt dl Istitut culturel ladin Cesa de Jan. Tl’ancunteda a Bulsan iel da tramedoi pertes unì detlarà de ulëi jì inant y nchinamei slargë ora la culaburazion culturela ladina.

USP - La Jonta provinziela de Bulsan à chëst ena dat pro de cumpré na sënta nueva per l Servisc provinziel dla Forestela a La Ila. Tl raion Bosc da Plan vëniel cumprà locai da ufize cun archif y garasc.

USP – La prima pert dla zircunvalazion de Auer i ncuei (11 merz) unida giaurida dal presidënt dla Provinzia Luis Drunwalder y dal assessëur Florian Mussner. Ncuei iel nce unì scumencià na pert mpurtanta per l segondo toch dla streda, cun l prim stlupeté a metù man i lëures per l tunel St.Daniel.

USP – Sun la cësa dl Teater comunel de Bulsan iel chisc dis unì metù su la scrita cun l inuem nce per ladin. “Chësc ie n var per sensibilisé la populazion de duta la Provinzia n cont de nosta mendranza” se ncunforta l assessëur provinziel Florian Mussner.

USP – Chi che ulëssa mparé n mestier tl ciamp dla sanità possa n vënderdi che vën, 13 de merz se fé n cheder dla furmazion che vën piteda tla scola auta per la sanità Claudiana a Bulsan. La portes unirà tenides daviertes dala 9.30 nchin la 13.00.

USP – L Istitut provinziel de Statistica Astat fej al savëi che nce sce l’espurtazion ie caleda de 14,8% tl cuarto trimester, ie per dut l ann 2008 unì arjont 2,0% de plu espurtazions cun n valor de 3.222,3 milions de Euro. Tl ann 2008 iel unì cumprà prudoc per 3.903,3 Euro da oradecà, che fej ora n aumënt de 6,2% permez al ann dant.

USP - Tl ann de scola 2008/09 iel tla Provinzia de Bulsan 77 scoles autes, cun de ndut 19.396 mutans y mutons. 1.041 sculeies à chëst ann messé fé do na tlas; la perzentuela media ie de 5,4%, tla scoles ladines iela de 6,6%. De duc i sculeies se à 1,9% scrit ite te na scola auta paritetica ladina. La cumpëida de sculeies zënza zitadinanza taliana ie de 1.036, che fej ora 5,3 sun 100 scric ite. Tla scoles autes ladines iel 3,0% di sculeies nia de naziunalità taliana. Chësc vën fat al savëi dal Istitut provinziel de statistica Astat.

USP - Danter la Ladinia y la Rumantschia iel unì metù a jì n cuntat nuef, n fil culturel che dëssa tres internet judé a svilupé cuntac danter i doi raions dala medema ravises. La plata internet Filcultural.info prejënta la doi realteies, mostra paraleles y pieta ucajion de paredlé.

USP – Rosmarie Crazzolara da S.Ciascian ie unida numineda ispetëura nueva dla Scoles ladines. La nomina da pert dl ntendënt Roland Verra vëija dant chësta ncëria cun scumenciamënt de setëmber 2009.

USP – La zità de Zhangjakou cun cin milions de abitanc tl nord dla Cina à nteres per l savëi n cont dl turism da inviern tl Südtirol. Argumënc dl’ancunteda danter la delegazion dala Cina y l Presidënt Durnwalder, nsëira (9 merz) ie nce stata l’agricoltura, l sistem de furmazion y l autonomia dla Provinzia de Bulsan.