Atualità

Daksy, le tass, acompagnarà da sëgn inant i mituns de Südtirol fora por i parcs naturai. An pò jì a ciafè la mascota tla plata web www.provinz.bz.it/daksy y tl sföi por mituns. Chëstes novitês é gnüdes presentades incö dal Assessur por l’ambiënt Michl Laimer.

6729 scolars dala terza tlassa dla scora elementara cina ala tlassa de maturité à tut pert al concurs “I cangurs dla matematica”. I intendënc’ Peter Höllrigl y Roland Verra à premié incö, ai 3 de mà, i mius scolars de matematica de Südtirol.

USP - N ucajion di 23 de auril 2007, Di nternaziunel dl Liber, sotrissea l assessëur per la Cultura y Scola ladina la mpurtanza dl liber per dé inant savëi, esperienzes desvalives y cultura. “I libri à la funzion de mantenì y arichì la cultura y rujeneda ladina” chësc auza ora l assessëur Florian Mussner che nvieia duta la populazion y dantaldut i jëuni a tò plu suvënz tla mans n bon liber.

USP - “La reazion di nseninac y dla nseniantes ala reforma tla scola elementera y mesana unirà tëuta n cunsciderazion, ënghe sce l unirà jit inant te chësta direzion”, dij l assessëur Mussner che tol pusizion al straich da inier di nsenianc y dla nseniantes. Śën vala de crì l dialogh.

I assessurs por la formaziun Otto Saurer y Florian Mussner à desmostrè tl comunicat stampa ch’ai ó condüje inant i sforc de reforma tles scores elementares y mesanes todësces y ladines. “Sambëgn tolarunse en conscidraziun la gran partezipaziun al scioper di insegnanć, incö ai 17 d’aurì, mo i jarun inant le tru dla concretisaziun y dl’individualisaziun dl stüde”, dij i dui assessurs.

“La consulënza por l’imparè, la poscibilité de na reflesciun autonoma por i scolars sciöch’ince la poscibilité de chirì fora individualmënter danter les ofertes de formaziun é punc; fondamentai de nosta politica de formaziun y te nosc laûr de portè inant la reforma scolastica.” Cun chëstes parores à l’assessur por la formaziun, Otto Saurer, ai 12 de aurì, confirmé che la reforma scolastica vëgn condüta inant.

USP - Tla conferënza stampa ai 12 d’aurì, a chëra ch’al vëgn invié i assessurs Otto Saurer y Florian Mussner, vëgnel tratè dla reforma dla scora y de sciöch’ara gnarà condüta inant tles scores elementares y mesanes ladines y todësces.

USP - “Stories: 7 cunties te cater lingac” à inom l’ultima publicaziun dl Istitut Pedagogich Ladin che vëgn presentada en dedemesaledema, ai 11 d’aurì dales 15.00 tl gran salf de comun a Santa Cristina cun la presënza dl assessur Florian Mussner. Dötes les insegnantes/düc i insegnanc y i interessà é dër bel invià de tó pert a chësta manifestaziun.

LPA - Le Museum Ladin scrî fora dui concursc por promöie i artisc locai: le pröm “Pest artistich de scoltöra Richard Agreiter” y la partezipaziun ala “II. Trienala Ladina”. I dui concursc gnarà presentà en dedemesaledema, ai 14 de merz 2007, te na conferënza stampa a Balsan.

Da n valgönes edemes é Gustav Mischi da Longiarü tla Val Badia gnü nominé diretur dl Ofize tecnich Strades nord-ost dl Departimënt por i laûrs publics dla Provinzia. L’Assessur por i laûrs publics Florian Mussner é dër contënt ch’al é stè n ladin a davagné le concurs por le post de diretur d’ofize.