Atualità

Usp – Sce n raport persunel garata, depënd n gran pert dala comunicazion garateda. Manieres per mëter a ji miec n raport persunel, possa nteressei mparé te n curs metù a ji dala scola profesciunela per l soziel de rujeneda taliana. Chësc curs vën tenì dal 14 nchin al 16 de jené tla scola per l soziel de Maran.

Usp – Cun l moto „se capì per lauré miec deberieda“ mët l servisc per svilup dl personal a ji n curs per educatëures y culaburatëures di servijes soziei. Chësc curs che mët man de fauré tla Haselburg a Bulsan, unirà tenì te cater pertes de mez n di. Nchin ai 5 de jené 2004 possen mo se nuté.

Usp – Nvalic zevii, vierces, sëurc y stoms giapa si pension de jené, ai 16 de jené 2004. L’autra rates dla pension unirà paiedes ora ai 2 de uni mëns, nsci iel unì fat ora dala Jonta Provinziela.

Tan dassën se à pa l internet fat da cësa tla populazion dl Südtirol? Te tan de cëses iesen pa tachei ite al internet y co vëniel pa adruvà? Aldò dla nrescides dl Astat, sun ncëria dl istitut naziunel de statistica ntan l ann 2002, ie ti ultimi doi ani aumenteda l adurvanza dl computer dl 47,1% y dl internet de 36,7% te nosta provinzia.

Usp – Te si ultima senteda da chëst ann à la Sgonda Cumiscion per la defendura dl’ambient dat pro de plu proiec. Danter chisc nce i lëures per fé su i mures de sustëni per la streda nueva dla Val Badia tl Chemun de S. Martin de Tor.

Usp – N aspitova bele ert de nrescì coche unissa spartides su la cumpetënzes tla Jonta provinziela nueva. Pra la senteda de chëst’ ena iel mo unì rujenà de chësc y pona riesc do iel uni fat al savëi tla cunferënza stampa.

Tl internet, iel da abinè la edizion nueva dl liber dla statistiches dl Südtirol 2003 cun i resultac dla nrescides dl ann 2002. Chësc tla plates provinzieles sota www.provinz.bz.it/astat/jb03. Tres la lingia de tabeles possen sé fé n cheder dla sozietà de nosta provinzia da plu ponc de ududa. Dala populazion y l raion al’economia nchin a cuestions de dërt.

Usp - La cumiscion per la valutazion dl mpat ambientel à dat pro de fé n zënter dal strom nuef a Longiarü, daujin al chël che ie bele. Chësc ie unì fat ora tla senteda de chëst’ ena.

Usp – Per la truepa jënt che unirà chisc dis tla Val Badia ie da ncuei, juebia ai 18, la streda ino davierta. L’urdinanza dl Assessëur Florain Mussner vel nchin ai 13 de auril 2004. Te chësta ucajon à Mussner ulù savëi tan inant che n ie cun i lëures. Sun cin tuniei ie cater bele giavei ora. Per l viadot nuef ie ot stizes bele sù. Al mumënt vëniel laurà per la segurëza.

ast - L svilup dla rujeneda ladina tl idiom de Gherdëina à nsnuet, mierculdi 17 de dezëmber, arjont n auter var mpurtant. Cun l CD nuef dl vocabuler tudësch-ladin de Gherdëina se lascel lauré plu saurì cun nosta rujeneda dl’oma. La forma digitela dl vocabuler de Marco Forni pieta, dantaldut per chëi che uël mparé l ladin, nce de pudëi audì la drëta pronunzia dla paroles. L Istitut Culturel Ladin Micurà de Rü à nsuet presentà l strumënt neuf tla scolina de Urtijëi cun na performance drët tucheda.