Atualità
La Junta provinziala aprovëia le plann anual por le sostëgn dla jonëza ladina
USP - “La jonëza dles valades ladines se dà dassënn da fà y les uniuns di jogn mët a jì n gröm de scomenciadies de valüta por la jënt jona. Por chësta rajun dess la jonëza ince gnì sostignida”, à dit l’assessur Florian Mussner. Sön domanda dl assessur Mussner à la Junta provinziala aprovè en lönesc, ai 11 d’aurì le plann anual por le sostëgn dla jonëza ladina.
Al pröm post sön la lista dles prioritês él zënzater les infrastrotöres por la jonëza. Le majer proiet che ara se trata de realisé é le Zënter per Jëuni, Ert y Cultura Gherdëina a Urtijëi. Mo tratan chësc ann déssel sambëgn inće gnì miorè d'atres infrastrotöres y posć d’incuntada tl ćiamp dl Laûr por y cun la jonëza. Gran importanza ti vëgnel inće dè ales ofertes y ai programs por jogn y jones, por ejëmpl por n’organisaziun creativa dl tëmp lëde o por la partezipaziun dla jonëza ala vita publica. “Por jogn y jones vëgnel bele organisé cotan. I proieć ne dess indere nia ma tó ite l’organisaziun dl tëmp lëde, mo inće i problems atuai y les domandes dla jonëza” arata Mussner. “Ai jogn y ales jones ti déssel gnì pité valch de significatif y de valüta mo sambëgn inće d’interessant ajache por la jonëza n’él nia saurì s’orientè te n monn plëgn d’ofertes sciöche chël d’al dedaincö” à dit l’assessur. La Provinzia ti darà al’organisaziun di jogn inće contribuć straordinars sciöche por le laûr de rëi informatica. Ales porsones che laora sciöche volontars por le Laûr por y cun la jonëza ti déssel gnì pité de plü cursc d’ajornamënt y de formaziun y tles majeres istituziuns dess spezialisć tl ćiamp pedagogich ofrì so sorvisc. Por les infrastrotöres por le Laûr por y cun la jonëza dles valades ladines à la Junta provinziala metü a desposiziun 421.000 euro y por la promoziun de ativitês él preodü indöt 170.000 euro.USP
