Atualità
Durnwalder, Dellai y Reolon s'incunta cun i ombolc ladins
USP - En lönesc, ai 19 de setëmber 2005 a Balsan gnaràl baié dl organism de rapresentanza di Ladins incër le grup dl Sela. Le Presidënt dla Provinzia Luis Durnwalder à invié so colegh trentin Lorenzo Dellai y le Prësident dla Provinzia de Belun Sergio Reolon, l’assessur Florian Mussner sciöche ince düc i ombolc dles cinch valades ladines a se sentè adöm y rajonè sön chësc argomënt.
La promoziun dles mendranzes en general y la rapresentanza dl grup linguistich ladin en particolar, sciöch’al é preodü dala lege nr. 482 por la promoziun dles scomanciadies por mendranzes linguistiches, é argomënt de discusciun dla incuntada dl Presidënt dla Provinzia Durnwalder, dl Presidënt dla Provinzia de Trënt Dellai, dl Prësident dla Provinzia de Belun Reolon y dl assessur Mussner cun i trëi ombolć ladins de Fodom, Col Santa Lizia y Cortina, i set ombolć dla Val de Fascia, i ot ombolć de Gherdëna y dla Val Badia y l’ombolt de Ćiastel sciöche rapresentant di interesc dla fraziun ladina de so comun. I resultać de chësta incuntada gnarà lascià al savëi ala stampa dales 18.15. I massmedia é invià a tó pert ala incuntada dla stampa sön n organism de rapresentanza por i Ladins en lönesc, ai 19 de setember 2005, incër les 18.15 tl salf dles sentades dla Junta provinziala, Palais Widmann, strada Crispi 3, a Balsan. Indicaziun ai massmedia: Al po gnì filmé y fotografè tl mëteman dla incuntada dales 17.00.USP
