Atualità
EUROSNOW 2006 – Snow festival by minorities for minorities
Dai 19 ai 22 de merz mët l’Intendënza Ladina inò a jì n festival dla rujenedes de mendranza – chëst iede tla verscion da d’inviern. I sculeies y la sculees de scoles mesanes de mendranzes de diesc raions dl’Europa se ancunterà tla valedes ladines. L prugram vëij danora uni sort de garejedes cun y zënza schi y na ciacia al tesor tl Museum ladin.
L festival dla rujenedes de mendranza metù a jì da l’Intendënza Ladina dan n valgun ani vën inò urganisà, chëst iede tla verscion da d’inviern. I sculeies y la sculees de scoles mesanes de diesc raions dl’Europa ulache l vën rujenà n lingaz de mendranza unirà inò tla valedes ladines.L tulerà pert i croac dal Burgenland (Austria), la mëndranza tudëscia dla Dänimarca, i gaelics y i scozesc dala Scozia, i sami dala Svezia, i walser dala Val d’Aosta, i furlans y i slovens dal Friul. Ghesć per l’ucajion sarà doi scoles dla provinzia de Bulsan, una de rujeneda tudëscia y una de rujeneda taliana, ora sambën dla delegazion di ladins dla Dolomites. Dai 19 ai 22 de merz uniràl adum a Al Plan ntëur n 300 ghesć.
L prugram vëij danora garejedes de schi y pudejé per chëi che sà da jí cun i schi, juesc sun la nëif y te nudadoia per duc i autri. Daldò uniral fat nce na ciacia al tesor y la desfileda cun i chentli da pert di maestri de schi. La garejedes de schi y pudejé vel nce coche Garejedes Interladines che vën metudes a jí uni ann dala istituzions de scola dla trëi provinzies ulache l viv i ladins. Urganisan ch’sta garejedes se gëura la scoles dl viers dl’Europa y les desmostra la ueia de partì la emozions dl vëster mendranza deberieda cun d’autra mendranzes.
La “Ciacia al tesor” unirà fata tl Museum Ladin de San Martin. L juech urganisà a na maniera mé visiva che ti vën pità ai 280 sculeies ti dajerà la puscibltà de cunëscer a na maniera uriginela la storia, la cultura y la rujeneda dl mond ladin.
Dut l prugram unirà urganisà a Al Plan y l cialerà de ti scinché mumënc de legrëza ai ghesć. L sarà na ancunteda danter la mendranzes y si sculeies y acumpaniadëures.
N lunesc ai 20 de merz dala 20. 30 prejenterà uni delegazion si raion cun cianties, mujiga y bai tl self dla manifestazions d’Al Plan de Mareo.
La scumenciadiva vën urganiseda dal’Intendënza Ladina n cunlaurazion cun l’Azienda de cura d’Al Plan y il Museum Ladin de San Martin; cun l sustëni finanziel dla Region Trentin Südtirol y la Fundazion Cassa dl Sparani.
UV
