Atualità
Assessurs Saurer y Mussner: “I sforc de reforma mëss jì inant”
I assessurs por la formaziun Otto Saurer y Florian Mussner à desmostrè tl comunicat stampa ch’ai ó condüje inant i sforc de reforma tles scores elementares y mesanes todësces y ladines. “Sambëgn tolarunse en conscidraziun la gran partezipaziun al scioper di insegnanć, incö ai 17 d’aurì, mo i jarun inant le tru dla concretisaziun y dl’individualisaziun dl stüde”, dij i dui assessurs.
I prinzips dla reforma dla scora ne vëgn nia mudà. Te döta l’Europa y sura döt le monn pon odëi n svilup che va tla direziun dl’individualisaziun y dla personalisaziun dl aprendimënt y Südtirol ne po nia ti stlü les portes.“Chësta individualisaziun po mâ gnì arjunta tres l’insegnamënt che va ite ti debojëgns de vigni scolar y de vigni scolara”, insciö dij Saurer y Mussner.
I punć fondamentai dla reforam resta inant la consulënza tl stüde, la documentaziun y la reflesciun di progresc d’aprendimënt sciöch’inće la poscibilité de chirì fora individualmënter danter les ofertes de formaziun che vëgn pitades dala scora.
La Junta provinziala à inier, ai 16 de aurì, straihé i punć critics fora dla delibra dl ann passè sön la reforma dla scora. “Chësc é stè le resultat de tratatives cun i sindacać”, insciö dij i assessurs provinziai. Deperpo che la Junta provinziala mina de ti ester jüda adincuntra ales ghiranzes di sindacać, ne n’á chisc odü plü degöna poscibilité da tratè inant.
“I ùn conscidré les respostes da pert dla scora, inće i insegnanć alda laprò, sön l’eserzitaziun dla reforma dla scora y sön la lege dla formaziun dla Provinzia y i n’ùn tignì cunt tla delibra nöia. Śëgn ćiarunse de aprovè ćiamò chësc ann la lege provinziala sön la reforma dles scolines”, à injuntè i assessurs.
“Insciö cheriunse do agn d’eserzitaziun dal ann de scora 2008/09 inant, inće la segurëza politica por l’introduziun dles inovaziuns tles scores elementares y mesanes”, insciö dij Saurer y Mussner.
usp
