Atualità
Premiazion dl cuncors de leteratura per sculeies y prejentazion dl liber “Cultura Ladina” ai 16 de mei tla Ntendënza Ladina a Bulsan
USP - Tl liber dal titul “Cultura Ladina” à Lois Ellecosta, nciarià dala Ntendënza Ladina, scrit truep sun la Cultura di Ladins dla Dolomites. La publicazion vën prejenteda ai 16 de mei 2007 tla Ntendënza Ladina a Bulsan. Dan la prejentazion sëurandà l Ntendënt Roland Verra i pes ai mutons y ala mutans che à venciù pra l cuncors de leteratura.
N gaujon dla premiazion dl cuncors de scri ladin per sculeies „Mi identità – nosta identità“, vëniel prejentà na documentazion per fé l ejam de Ladin tla scola dal titul „CULTURA LADINA“, curà da Lois Ellecosta y dat ora dala Ntendënza Ladina. Te chësc liber vëniel dat na lingia de nfurmazions sun i Ladins dla Dolimites, si ambient, si chemuns, si cultura, si sistem scolastich y si storia. Sëuraprò iel nce na pert dedicheda ala regules de ortografia ufiziela dl Ladin dla Val Badia y dl Gherdëina.
I autors di capituli de chësta publicazion ie:Paolina Agreiter, Ruth Beranrdi, Christina De Grandi, Francesca Giovanazzi, Alfred Irsara, Maria Christina Lezuo, Leander Moroder, Edith Ploner, Theodor Rifesser, Ingrid Runggaldier, Josef Runggaldier, Erica Senoner, Roland Verra, Paul Videsott, Elsa Zardini y Lois Ellecosta che à abù l l ëur de coordinament y de sëuravijion de dut l liber.
"Chësta publicazion ie de gran utl nia mé per chëi che muessa fé l ejam de ladin per l nseniamënt, ma ënghe coche mesum de nseniamënt dl ladin, dantaldut tla scoles autes, ulache l ne ie nchina mò nia n liber de chësta sort", dij l Ntendënt Roland Verra. "Da chësta oprea possa na persona nteresseda se tò ora bëndebo de nfurmazions mpué sun duc i ciamps che nteressea nosta mendranza y per dut l raion dla Dolomites", dij Verra.
Daviadechël ie l’ucajion dla premiazion de n cuncors de leteratura per sculeies, che tol ite duta la cin’valedes ladines, l drë’mumënt per prejenté nce chësta publicazion culturela de gran mpurtanza per duc i ladins dla Dolomites.
I media ie nviei
ala premiazion
y ala prejentazion dl liber
"Cultura Ladina"
n mierculdi, ai 16 de mei 2007, dala 15.00
tla Ntendënza Ladina
tla streda Binder/Bottai 29 a Bulsan
y de cumenté sun la festa.
SAN
