Atualità
Premiazion dl cuncors de leteratura per sculeies “Mi identità – nosta identità”
Ai 16.05.2007 dala 15 iel stat tla sënta dla Ntendënza Ladina a Bulsan, la premiazion dl cuncors de leteratura per sculeies “Mi identità – nosta identità” , metù a jì dala Ntendënza per la scoles ladines adum cun l Istitut Pedagogich Ladin, la Union Generela di Ladins dla Dolomites y i trëi Istituc Ladins de S. Martin, Vich y Col de S. Lizia.
Chësta scumenciadiva per la scoles mesanes y autes de duta la valedes ladines dla Dolomites uel descedè l nteres per l scrì criatif ladin danter i jëuni. L tema de chëst ann fova do la rata plutosc rie y à purtà a lëures de n bon livel che se à dat ju cun formes artistiches de plu sortes nia mé cun l’identità ladina, ma nce cun chëla persunela tl mond globalisà de al didancuei. Bona ie stata la partezipazion dla scoles mesanes dla valedes ladines, ulache l ie ruvà ite lëures particularmënter garatei per si carater uriginel y ënghe per la formes multimediales de prejentazion: dala storia curta ala poejia, dal Power Point al film y a autra formes mescededes.
Per la scola auta iel stat manco partezipazion y chësc desmostra che l nseniamënt dl ladin se à deplu nravisà a livel de scola mesana. La juria, metuda adum da n rapresentant de uni una dla Istituzions Ladines che à sustenì l proiet, à perchël premià plu lëures dla scola mesana:
- L prim pest ie jit a Julian Clara dla Scola Mesana de S. Martin cun la storia “La picia cargara vërda”.
- L segondo pest per la Scola Mesana ie jit a 3 i sculeies dla Scola Mesana de Urtijëi Damian Senoner, Elias Runggaldier y Samuel Villotti, cun na lingia de cianties cun test uriginel sun mujighes cunesciudes.
- L terzo pest ti ie jit a la sculées Manuela Runggaldier y Jennie Insam dla 3. D dla Scola Mesana de Urtijëi cun na prejentazion Power Point de poejies drët fines.
- Doi cuarti pesć ie jic a sculées dla Scola Mesana de Urtijëi Beatrice Prinoth y Luianta Verra y dla Scola Mesana de Ampëz, Erica Belladis, Lara Dapoz, Roberta Franceschi, Martina Lancedelli y Emma Menardi.
- Trëi cuinti pesć ie ruvei tla Scola Mesana de S. Martin a Patrick Chizzali y a Vincent Mair y te chëla de Urtijëi ala grupa de mutans Teresa Senoner, Giulia Walpoth y Miriam Kostner.
Per la Scola Auta iel unì dat ora:
- L segondo pest al studënt Simon Perathoner dla Scola d’Ert de Urtijëi cun n film curt dal titul: “Identità adrova si tëmp” y
- Doi terzi pesć adum ie jic al Lizeo Scientifich de Poza cun na lingia de 6 stories scrites da Jlena Casergranda y Serena Trottner, Anna Zulian y Daniela Zulian, Giorgia Rovere y Marianne Deluca, Emanuel Riz y Gianmaria Ganz, Martina Cianciulli, Giulia Riz.
Duc i pesć ie bons per cumpré material de scola o libri, aldò di fins educadives de chësc cuncors.
N chësta ucajon iel stat nce prejentà l liber “Cultura Ladina” a cura de dut. Lois Ellecosta che ie na documentazion per i candidac che muessa fé l ejam de Ladin per la scola. L Liber ie dat ora dala Ntendënza Ladina y uel vester n cheder generel dla cultura, dla vita, dl raion y dla scola ladina te dut l rajon dla Dolomites. Daviadechël iel sëuraprò n liber de utl per l nseniamënt dl Ladin dantaldut tla scoles mesanes y autes.
USP
