Atualità
Di dla cultura ladina ai 12 de utober 2007 a Bulsan
N vënderdi, ai 12 de utober 2007, vëniel tenì tl Palais Widmann a Bulsan "l di dla cultura ladina". La tematica de chëst ann ie: " Globalisazion y identità: na oportunità o n pericul per la cultura ladina?" L cunvëni vën urganisà dal Assessorat per la cultura ladina.
La presënza dlonchora per l mond di medemi bëns de cunsum y dla medema imajes mëina a na omegenisazion dla cultura populera y da uni di. Chësc dà tl uedl dantaldut ti ciamps dla mujiga pop, dla moda y dl film. La tecnologia dla comunicazion ie de gran mpurtanza sibe per la omegenisazion dla cultures che per la trasmiscion y la retificazion de cultures nueves. Coche cunseguenza dla globalisazion y tres la for majera omegenisazion dla cultura da uni di ie usanzes y manieres de viver locales, formes d'ert tradiziuneles, ma nce rujenedes y mendranzes tl pericul de sfanté. Co ie pa la cultura ladina bona de ti sté permez a chësc svilup?
L cunvëni che unirà tenì n vënderdi, ai 12 de utober tl Palais Widmann a Bulsan, vëij danora chësc program:
Dala 9.00 unirà la manifestazion nvieda via dal Presidënt dla Provinzia Luis Durnwalder y dal Assessëur ladin Florian Mussner.
A pië via dala 9.15 saral chisc referac
- Frank Thorsten Moll, curatëur: „Kulturelle Globalisierung und die bildende Kunst“
- Ulrich Runggaldier, prufessëur WU Viena: „Globalisierung und Identität“
- Acumpaniamënt de mujiga dla grupa Acajo
Ntëur la 11.30 scumencerà na descuscion pra la mëisa turonda cun l Assessëur per la scola y la cultura ladina Florian Mussner, Andrea Rassel, vizepresidënt dla FUEN (Federal Union of European Nationalities), Lucio Giudiceandrea, jurnalist y autor, Rosemarie Crazzolara, diretëura dla scoles d' Al Plan. La descuscion vën modereda da Diego Clara.
USP
