Atualità
Durnwalder a Viena per rujené tl Bundesrat
USP – Duman mierculdi, 21 de mei sarà l presidënt dla provinzia Durnwalder ghest dl Bundesrat a Viena, la segonda camera dl parlamënt dl’Austria. Sun nvit dl presidënt dl Bundesrat Helmut Kritzinger rujenerà Durnwalder dla situazion politica y economica dl Südtirol ma nce di raporc danter Bulsan, Viena y Roma.
Da n valgun’ enes ie Helmut Kritzinger, dla valeda de Sarentin, a cë dla segonda camera dl parlamënt a Viena. Tl Bundesrat iel i reprejentanc di Bundesländer dl’Austria. Sun nvit dl presidënt Kritzinger jira Luis Durnwalder a Viena per la senteda dl Bundesrat y per rujené dl Südtirol. Do l presidënt dla Cumiscion dla Union Europea José Manuel Barroso, ie Durnwalder permo l segondo nia austriach, che vën nvià a na senteda dl Bundesrat.
AS
